Stop Israel's Bombing of Gaza! - BMP, PLM, and MASO

Sigaw ng manggagawa: "NLRC Chairman Nograles, mag-resign ka na!"

SIGAW NG MANGGAGAWA: "NLRC CHAIRMAN NOGRALES, MAG-RESIGN KA NA!"

Hunyo 10, 2014 - Inilunsad ng iba't ibang grupo ng manggagawa, sa pangunguna ng grupong Workers Coalition Against Corruption, ang panawagang pagpapatalsik kay Commissioner Gerardo C. Nograles ng National Labor Relations Commission (NLRC), kaninang umaga sa harap ng tanggapan ng NLRC sa Banaue St., Lungsod Quezon.

Inumpisahan ang programa sa pamamagitan ng pambansang awit na "Lupang Sinira", sunod ay ang awiting "Internasyunal" na pinangunahan ng grupong ChopSuey, kung saan nagtaas ng kaliwang kamao ang mga dumalo.

Ayon sa mga manggagawa, ang NLRC ay naging kalakalan na at katayan ng kaso ng mga manggagawa. Ibig sabihin, hindi talaga naglilingkod sa mga manggagawa ang ahensyang ito, bagkus ay natatalo pa ang mga dapat sanang panalo na ng manggagawa. Halimbawa na lang ay ang mga tinanggal dahil sa unfair labor practice. Dapat ibalik ang mga manggagawa, ngunit hindi sila nakakabalik, at hindi pa nababayaran. Sinabi pa nila, batay na rin sa mga plakard, na pinaka-corrupt na labor arbiters ng NLRC-NCR sina Arbiter Pablo Gajardo at Arbiter Enrique Flores.

Nagsalita sa entablado ang iba't ibang lider manggagawa mula sa Workers Coalition Against Corruption, AGLO (Association of Genuine Labor Organizations), BMP (Bukluran ng Manggagawang Pilipino), DEU (Digitel Employees Union), pangulo ng unyon ng Manila Plastic, pati na si Atty. Jimmy Miralles at Atty. Paguio.

Ulat at mga litrato ni Greg Bituin Jr.

Ang Karapatang Maorganisa at Mag-organisa

Karapatan ng bawat isa ang maorganisa at mag-organisa!
Karapatan ng bawat manggagawa na maorganisa at mag-organisa!

Ika-4 na Kongreso ng NCL, Inilunsad

IKA-4 NA KONGRESO NG NCL, INILUNSAD

Sa temang "Sosyalistang Lipunan, Sagot sa Kahirapan", matagumpay na inilunsad ng National Confederation of Labor (NCL) ang kanilang ika-4 na Kongreso sa Magsaysay Hall ng SSS Building, East Avenue, sa Lungsod Quezon nitong Mayo 22, 2013.

Sa umaga ay nagkaroon ng pagtalakay hinggil sa programa ng SSS, lalo na sa usapin ng social protection. Ang naging tagapagsalita dito ay sina SSS Commissioner Bong Malonzo at Ms. Judy See.

Matapos iyon ay pormal nang binuksan ang Kongreso, kung saan punumpuno ito ng awitin mula sa grupong Chopsuey, at talumpati ng iba't ibang lider-manggagawa. Nagbigay ng Welcome Remarks si Atty Bayani Diwa, sec gen ng NCL. Inspirational talk naman hinggil sa sitwasyon ng uring manggagawa sa kasalukuyan at sosyalismo si Atty. Antonio Paris ng PKP 1930. Si Atty. Ernesto Arellano, pangulo ng NCL, ang nagbigay ng introduksyon sa panauhing pandangal na si DOLE-NCMB Executive Director Reynaldo Ubaldo.

Binigyang-pugay naman ng NCL ang mga taong responsable sa kanilang pagkakatatag bilang organisasyon ng manggagawa. Binigyan nila ng plake ng pagkilala sina Atty. Ibarra Malonzo, Atty. Benjamin Alar, Atty. Gaston Taquio, Ka Dominador "Domeng" Mamangon, Ka Zosimo Carullo, Ka Rey Capa, Ka Angelito "Lolo" Mendoza, at ang pinaslang na si Filemon "Ka Popoy" Lagman. Binigyan din ng plaque of appreciation sina Atty. Ernesto Arellano at Atty. Bayani Diwa.

Dito rin inilunsad ang unang isyu ng kanilang 8-pahinang pahayagang Pingkian. Ayon sa emcee, umabot ng 210 ang bilang ng mga dumalo. Ang mga emcee ay sina Larry de Guzman at Lilibeth Aycardo.

Sa hapon naman ay ang hinggil sa organisasyunal na usapin, tulad ng pag-amyenda sa Saligang Batas, mga resolusyon, at halalan.

Ang mga grupo ng manggagawang bumubuo ng NCL ay ang ATU, CITYNET, KAMPIL, KASAMA, KMM, LAWIN, NFL, NUBCW, OBRERO, SOCIALISTA at UFSW.

Ulat at mga litrato ni Greg Bituin Jr.

SWAC - Solidarity of Workers Against Contractualization

Mayo 1, 2014 - Dumalo sa unang pagkakataon sa paggunita sa Pandaigdigang Araw ng Paggawa ang mga kasapi, tagasuporta at tagapagtaguyod ng SWAC o Solidarity of Workers Against Contractualization. Sila'y nagmartsa mula Welcome Rotonda hanggang Mendiola.

Layunin nilang organisahin ang mga manggagawang kontraktwal na pinahihirapan ng salot na sistema ng kontraktwalisasyon, na imbes na maging regular ang mga manggagawa ay umiiwas ang mga kapitalista't may-ari ng kompanya sa pagbibigay ng benepisyo sa kanilang mga manggagawa.

Para sa anumang katanungan hinggil sa SWAC, mangyaring makipag-ugnayan sa telepono blg. 4345478, at hanapin si Gie Relova.

Ulat at mga litrato ni Greg Bituin Jr.

Ang Guro at ang Araw ng Paggawa - ni Ramon B. Miranda

Ang Guro at ang Araw ng Paggawa

ni Ramon B. Miranda

Mayo Uno – Ang Pandaigdigang Araw ng mga Manggagawa sa buong mundo. Sa tuwing sasapit ang araw na ito, milyun-milyong manggagawa sa buong daigdig ang naglulunsad ng mga iba't ibang aktibidades upang ipagdiwang ang araw na ito. Ilan sa mga ito ay ang pagsasagawa ng rali, kilos-protesta, dayalog at marami pang iba.

Bakit nga ba ipinagdiriwang ang araw na ito? Ayon sa pananaliksik ng mga eksperto sa paggawa, ginugunita sa araw na ito ang mga sakripisyo ng mga martir na manggagawang namatay sa Haymarket Square sa Chicago nang magsagawa sila ng isang sama-samang pagkilos noong Mayo 1886 para ipaglaban ang pagsasabatas ng walong oras na paggawa. 

Naging inspirasyon ng mga manggagawa sa buong daigdig ang pagkilos na iyon upang mapababa sa walo ang oras paggawa na dati-rati’y umaabot ng labingdalawa (12) o mahigit pa noong nakaraang mga panahon. 

Dito sa Pilipinas, pinangunahan ng Union Obrera Democratica de Filipinas ang unang pagdiriwang ng Mayo Uno na nilahukan ng 100,000 manggagawang Pilipino mula sa iba’t ibang pagawaan.

Sa ating mga kaguruan, nararapat din bang makiisa tayo sa pagdiriwang ng Araw ng Paggawa? Maraming mga guro ang nagsasabing hindi naman daw sila manggagawa, bakit sila makikiisa sa pagdiriwang ng Araw ng Paggawa? Ayon pa sa kanila, may sariling laban ang guro na kaiba sa laban ng mga manggagawa. Ilan lamang ito sa mga kadahilanan kung bakit ang ilang mga guro ay napakakunat ng paglahok sa pakikibaka ng uring manggagawa.

Bilang mga guro, nararapat lamang tayong lumahok sa pagdiriwang ng Araw ng Paggawa sapagkat tayong mga guro ay nabibilang din sa uring manggagawa. Bilang paglilinaw, ang mga manggagawa ay walang pribadong pag-aari sa kasangkapan sa produksyon upang makalikha ng iba’t ibang produkto na kailangan niya at ng sangkatauhan. Wala siyang pag-aari kundi ang kanyang sariling lakas na ibinebenta upang magtrabaho sa mga nagkalat na pagawaan. Sa pamamagitan ng pagbebenta ng kanyang pag-aaring lakas-paggawa, binibigyan naman siya ng kapitalista ng bayad na kung tawagin ay sahod na siyang ginagamit niya sa kanyang pang-araw-araw na pangangailangan upang mabuhay.  

Katulad ng mga manggagawa, ang mga guro ay walang pribadong pag-aari tulad ng paaralan o iba't ibang institusyon na may kinalaman sa edukasyon. Ang tanging pag-aari natin ay ang ating kaalaman sa pagtururo upang humubog ng mga mag-aaral para maging mabuting mamamayan sa hinaharap. Ang kaalamang ito ang ating ibinibenta sa mga naglipanang may-ari ng mga paaralan o pamantasan sa ating bansa. Ang tanging hinihingi nating kapalit sa pagbebenta ng kaalaman ay ang tinatawag na sahod. Ano ngayon ang kaibahan natin sa manggagawa? Hindi ba’t kabilang din tayo sa uring manggagawa?

Ang mga manggagawa at mga guro ay nagpapagod at nagpapawis upang mabuhay bilang tao. Kung ikaw ay may-ari ng isang pagawaan, hindi ka na manggagawa, ang tawag na sa iyo ay kapitalista. Kung ikaw ay isang guro na nagmamay-ari ng isang paaralan o pamantasan, ang tawag rin sa iyo ay kapitalista. Maaring mabibilang lang sa daliri ang mga kapitalisang edukador na nagtuturo sa paaralan o pamantasan sa dahilang ang tanging layunin ng kapitalista ay paghahangad na lumaki ang kanyang tubo. 

Ngunit lagi’t lagi nating tatandaan, “Mawawala ang kapitalista pero ang manggagawa kailanma’y hindi mawawala. Mawawala ang mga kapitalistang edukador ngunit ang mga guro ay mananatili.”

Tayong mga guro ay may kaparehong laban sa katulad nang nangyayari sa hanay ng mga manggagawa. Kung inyong matatandaan, naipanalo nating mga guro ang laban sa 6 Hours Teaching Load na dati-rati’y umaabot sa 8 oras at umaabot pa ng 12 hanggang 16 na oras, lalo na ang mga nagtuturo sa mga probinsiya. Manipestasyon lamang ito na hindi tayo hiwalay sa laban ng manggagawa dahil aminin man natin o hindi, tayo ay nabibilang sa “Uring Manggagawa”.

* Si Ginoong Ramon B. Miranda ay guro, makata at manunulat. Siya ay guro sa Arellano High School sa Doroteo Jose St., sa Sta. Cruz, Maynila. Isa rin siya sa mga opisyal ng pambansang grupong Teachers Dignity Coalition (TDC), at isa sa mga haligi ng AtingGuro Partylist.

Forum ng manggagawa hinggil sa ASEAN Economic Integration, inilunsad sa Marikina

Inilunsad ng WFTU - Phils (World Federation of Trade Unions - Philippine chapter) ang isang napakahalagang pulong-talakayan (forum) hinggil sa ASEAN Economic Integration (AEI) na ginanap sa Shoe Hall ng Marikina City Hall nitong Abril 15, 2014, araw ng Martes, mula ika-3:00 ng hapon hanggang ika-7:00 ng gabi. Ang mga pangunahing tagapagsalita ay sina Ka Sonny Melencio, pangulo ng Partido Lakas ng Masa (PLM), at Ka Rasti Delizo ng Sanlakas. Ang tagapagpadaloy naman ng nasabing pulong-talakayan ay si Ka Leody de Guzman ng BMP. Dumalo rito ang mga kinatawan ng iba't ibang grupong kasapi ng WFTU sa Pilipinas, tulad ng BMP (Bukluran ng Manggagawang Pilipino), Katipunan, NATU (National Alliance of Trade Unions), TUPAS (Trade Unions of the Philippines and Allied Services), Socialista, KASAMA, KUA (Kilusan ng Uring Anakpawis), Proletaryong Rebolusyonaryong Kilusan (PRK), at Cavite Group.

Nagbigay naman ng kanilang reaksyon o pananaw sina Ka Egay Bilayon ng PNR at pangulo rin ng ICLS (International Center for Labor Solidarity), Ka Raul ng Katipunan, Ka Danny ng PRK, Ka Blessy ng Socialista, Ka Josie ng PM, Ka Larry de Guzman ng Kasama-NCR, Ka Gerry Puyat ng KUA, at Ka Rodel Atienza ng BMP. Nagbigay naman ng mga makabagbag-damdaming awiting manggagawa ang grupong ChopSuey sa pangunguna nina Josie sa pag-awit at Ojie Tan sa pagtugtog ng gitara. Ang nag-isponsor naman ng meryenda ng mga dumalo ay ang Marikina Workers Affairs Office.

(Ulat at mga litrato ni Greg Bituin Jr.)