Sa bayan ng mga kurakot

SA BAYAN NG MGA KURAKOT

nakilala ang bayan ng mga kurakot

dahil sa buwaya't buwitreng nanunulot

ng proyektong flood control na katakot-takot

ang bilyones na perang kanilang nahuthot

mga bata'y di makapasok sa eskwela

dahil dadaanan nila'y bahâ talaga

bahâ paglabas pa lang ng tahanan nila

bahâ pagpasok pa sa trabaho ni ama

ano nang nangyari sa proyektong flood control

na sana'y di binabahâ ang mga pipol

di sa flood control, sa pansarili ginugol

kabang bayan ay dinambong ng mga ulol

ang kakapal ng mukhâ ng mga kurakot

nagpayaman sa pwesto, kaban ay hinuthot

sa bilyones na ninakaw sila'y managot

dapat silang makulong at di makalusot

nagbabahâ pa rin sa maraming probinsya

at kalunsuran dahil sa ginawa nila

proyektong bilyon-bilyon ay naging bulâ na

sinagpang ng walang kabusugan talaga

napakinggan ng bayan ang mga kontrakTONG

sa harap ng TONGresista't mga senaTONG

inamin nilang sa badyet ay may insersyon

sigaw ng bayan: lahat ng sangkot, IKULONG!

- gregoriovbituinjr.

10.23.2025

* litrato kuha sa Luneta, Setyembre 21, 2025

Minimum Wage sa mambabatas, Living Wage sa manggagawa

MINIMUM WAGE SA MAMBABATAS, LIVING WAGE SA MANGGAGAWA

saludo kina Eli San Fernando at Renee Co

sa panawagang minimum wage na sa solon sweldo

tunay silang lingkod bayan ng karaniwang tao

sa kanila'y nagpupugay akong taaskamao!

kayang mabuhay sa minimum wage ng mambabatas

kahit sa kongreso't senado, bangko'y binubutas

ngunit magsisipag kayâ ang trapong talipandas?

na gawin ay batas na para sa lahat ay patas?

kayang mabuhay sa minimum wage ng kongresista

tongpats o insersyon sa badyet ba'y mawawala na?

o kailangan talagang baguhin ang sistema?

nang mawala na ang pulitikal na dinastiya!

ngunit di sapat ang minimum wage sa manggagawà

lalo't buhayin ang mundo ang tungkuling dakilà

silang gulugod ng ekonomya ng bawat bansâ

ngunit sila pang manggagawà ang nagdaralitâ

kayâ sigaw ng manggagawà ay SAHOD ITAAS!

ay di pa dahil wala sa minimum wage ang sahod

kundi mas mataas sa minimum wage ay maabot

kayâ LIVING WAGE ang sinisigaw nilang madalas

iyang LIVING WAGE nga'y nakasulat sa Konstitusyon

mawalâ ang political dynasty pa'y naroon

subalit di naman naisabatas hanggang ngayon

ay, iyan pa kayang minimum wage para sa solon?

- gregoriovbituinjr.

10.22.2025

Salamat, Bianca, sa iyong pag-alala

SALAMAT, BIANCA, SA IYONG PAG-ALALA

salamat, Bianca Umali, sa concern mo

doon sa NAIA sa laksang pasahero 

na nakita mong nakaupo lang sa sahig

gayong sementong iyon ay sadyang kaylamig

anya, sana'y may pansamantalang upuan

para sa nanay, lola't batang kababayan

tagos sa buto ko ang kanyang pakiusap

na sana namamahala'y gawin nang ganap

nakapagtatakang di iyon naiisip

ng namamahala, di ba nila nalirip

kung saan uupo ang mga bibiyahe

sana sila'y di manatiling bulag, bingi

silya't gamit ay pansamantalang inalis

upang konstruksyon daw ng NAIA'y bumilis

subalit nasa sahig, naghihintay ng flight

ang mga pasahero't ganyan ang naging plight

salamat, Bianca, sa iyong malasakit

at karapatang pantao'y iyong giniit

pakiusap na sa gitna ng pagbabago

dapat di profit ang tingin sa pasahero

- gregoriovbituinjr.

10.22.2025

* ulat mula sa pahayagang Pang-Masa at Pilipino Star Ngayon, Oktubre 21, 2025

Aga, iga, ugâ

AGA, IGA, UGÂ

ilang lindol na ba ang nagdaan?

ilang lungsod na ba ang binahâ?

ilang senaTONG na ang kawatan?

ilang flood control ang di nagawâ?

dapat kay-aga nating mabatid

anumang sakunang paparating

anumang mangyari sa paligid

dahil may instrumentong magaling

kailan ba baha'y maiiga?

kung maayos na ba ang flood control?

pag-uga'y dapat paghandaan na

ay, dapat makaiwas sa lindol

tayo'y marapat magtulong-tulong

pag matinding pag-uga'y dumatal

paghandaan saan magkakanlong

paghahanda'y sa diwa ikintal

- gregoriovbituinjr.

10.21.2025

Sa hagupit ng kalikasan at pulitiko

SA HAGUPIT NG KALIKASAN AT PULITIKO

tumitindi ang hagupit ng kalikasan

at pulitikong binoto ngunit kawatan

sa baha't lindol, mag-ingat ang taumbayan

trapong kawatan na'y dakpin at parusahan

sa kalikasan, masa'y may adaptasyon pa

at mitigasyon ngunit ingat din talaga

maghanda sa mangyayari't mananalasa

lindol at pagbaha'y paghandaan ng masa

ang kinupitang ghost flood control na proyekto

buwis ng bayan ang kinawat na totoo

aba'y sabay-sabay nilang dinedelubyo

ang bansang Pilipinas, aray ko! aray ko!

di lamang basta milyon, kundi bilyon-bilyon

ang nakaw ng mga buwayang mandarambong

ng mga TONGtraktor, TONGresista't senaTONG

kawatang dapat nang managot at makulong!

ay, sadyang kaylupit ng kanilang hagupit

dapat lang ang bayan ay talagang magalit

ibagsak silang sa kabang bayan nangupit

at tiyakin ding di sila makapupuslit

- gregoriovbituinjr.

10.21.2025

Di man ako sinamahan

DI MAN AKO SINAMAHAN

siyang tunay, di nila ako sinamahan

baka tingin nila ako'y nang-uuto lang

subalit itinuloy ko ang panawagan

dahil kung hindi, ito'y isang kahihiyan

baka sabihin nila, "Wala ka pala, eh!"

at malaking dagok ang kanilang mensahe

subalit tulad kong sa masa'y nagsisilbi

pinakitang may isang salita't may paki

baka sila'y abala sa sariling buhay

baka ako'y inaasahan silang tunay

baka sila'y abala sa kanilang bahay

baka ako kasi'y pulos lang pagninilay

baka ako'y lihim na kinukutya nila

isang makatang walang kapag-a-pag-asa

kaya napagpasyahan kong kahit mag-isa

tuloy ang laban, tuloy ang pakikibaka

ayos lang, walang samaan ng loob dito

pagkat mahalaga'y may nagagawa tayo

aking ipagtatapat, ito ang totoo:

inangkin ko na'y laban ng dukha't obrero

- gregoriovbituinjr.

10.20.2025

* kuha sa tapat ng NHA, Oktubre 17, kasabay ng International Day for the Eradication of Poverty

Paksâ

PAKSÂ

nais kong isulat ang samutsaring paksâ

ng madaling araw nang di pa inaantok

nakakapagod din ang maging maglulupâ

na layunin ay baligtarin ang tatsulok

mga ideya'y nagsulputang walang puknat

habang karimlan pa'y pusikit at tahimik

mga paksang sapat upang makapagmulat

at bawat letra roon ay nais umimik

bakit ba isip ay nasa himpapawirin?

habang mga luha'y naglalandas sa pisngi

bakit ba bituin ay lalambi-lambitin?

upang makita ang diwatang kinakasi?

bakit mga buwaya sa pamahalaan

ay gutom na gutom at tila di mabusog?

na kapara'y mga buwitre sa tanggapan

nilang sinagpang ang kahit na lasog-lasog?

aanhin ko ba ang naririyang palakol?

para ba sa ulo ng korap na pahirap?

na limpak-limpak ang kita sa ghost flood control

paano ba gugulong ang ulo ng korap?

- gregoriovbituinjr.

10.19.2025

Plan, Plane, Planet

PLAN, PLANE, PLANET

gaano man kapayak ang plano

upang mabuhay sa bayang ito

ang mamamayan mang ordinaryo

mahalaga'y nagpapakatao

hindi pinagsasamantalahan

hindi inaapi ng sinuman

dangal ay hindi niyuyurakan

dignidad niya'y iniingatan

tulad ng pag-ingat sa daigdig

na binunga ng laksang pag-ibig

sinisira ng mga ligalig

mga dukha'y winalan ng tinig

habang kayrami ng nauulol

sa pondo't proyekto ng flood control

ngayon, ang bayan na'y tumututol

at protesta ang kanilang hatol

sa gobyerno, laksa'y mandarambong

na lingkod bayang dapat makulong

halina't tayo'y magtulong-tulong

at tiyaking may ulong gugulong

karimlan man ay laging pusikit

dapat madama nila ang galit

ng bayang kanilang ginigipit

sa madalas nilang pangungupit

sa kaban ng bayan, ay, salbahe

ang mga trapong kung dumiskarte

ay di ang maglingkod o magsilbi

kundi sa masa'y makapang-api

- gregoriovbituinjr.

10.18.2025

Sa taho

SA TAHO

mayroong istiker sa lalagyan ng taho:

sabi: "Lahat ng kurakot dapat managot!"

siyang tunay, korapsyon sana nga'y maglaho

pati na mga corrupt, kurakot, balakyot!

Oktubre na, wala pang nakulong na korap

o baka ang kawatan ay pinagtatakpan

ng kapwa kawatan, aba'y iyan ang hirap

kanya-kanyang baho'y inamoy, nagtakipan

dapat taumbayang galit na'y magsigising

huwag tumigil hanggang korap na'y makulong

magbalikwas na mula sa pagkagupiling

at tiyakin ng masang may ulong gugulong

di matamis kundi kumukulo sa galit

ang lasa ng tahong binebenta sa masa

pasensya ng masa'y huwag sanang masaid

baka mangyari ang Nepal at Indonesia

- gregoriovbituinjr.

10.17.2025

Kumilos ka

KUMILOS KA

umiyak ka

magalit ka

at kung di ka

kumikilos

eh, ano ka?

dinastiya

at burgesya

trapong imbi

namburiki

ng salapi

mula kaban

nitong bayan

silang mga

manlilinlang

at kawatan

kaya pulos

sila korap

humahangos

pag panggastos

at panustos

ang usapin

nais nilang 

bayan natin

ay korapin

at linlangin

makibaka

kumilos ka

baguhin na

iyang bulok

na sistema

- gregoriovbituinjr.

10.16.2025

* litrato kuha sa Mendiola, Maynila, Oktubre 2, 2025

Wakasan ang oligarkiya!

WAKASAN NA ANG OLIGARKIYA!

pusò ng oligarkiya'y talagang halang

pati kakainin ng dukha'y sinasagpang

sa buwis nga ng bayan sila'y nakaabang

ugali nila'y mapanlinlang, mapanlamang

katulad din nila ang mga dinastiya

na ginawa nang negosyo ang pulitika

iisang apelyido, iisang pamilya

sila lang daw ang magaling sa bayan nila

tingni, kung ikaw sa bansa nakasubaybay

oligarkiya't dinastiya'y mga anay

silang ang  bayan natin ay niluray-luray

kaban ng bayan ang ninakaw at nilustay

huwag na tayong maging pipi, bingi't bulag

sa kanilang yamang di maipaliwanag

wakasan na ang kanilang pamamayagpag

sa pagkaganid nila'y dapat nang pumalag

- gregoriovbituinjr.

10.16.2025

* litrato kuha sa Luneta, Maynila, Setyembre 21, 2025

Basura, linisin!

BASURA, LINISIN!

"Basura, linisin! Mga korap, tanggalin!"

panawagan nila'y panawagan din natin

dahil BASURA plus KORAPSYON equals BAHA

mga korap ay ibasura nating sadya

kayraming kalat, upos, damo, papel, plastik!

walisin na lahat ng mapapel at plastik!

oligarkiya't dinastiya, ibasura!

senador at kongresistang korap, isama!

may korapsyon dahil may Kongresista Bundat

kaban ng bayan ang kanilang kinakawat

at may korapsyon dahil may Senador Kotong

na buwis ng mamamayan ang dinarambong

tarang maglinis! baligtarin ang tatsulok!

sama-samang walisin ang sistemang bulok!

O, sambayanan, wakasan na ang korapsyon!

kailan pa natin gagawin kundi ngayon!

- gregoriovbituinjr.

10.15.2025

* litrato kuha sa Luneta, Setyembre 21, 2025

Maging magsasaka sa lungsod

MAGING MAGSASAKA SA LUNGSOD

halina't tayo'y magtanim-tanim

upang bukas ay may aanihin

tayo man ay nasa kalunsuran

mabuti nang may napaghandaan

baka di makalabas at bahâ

lepto ay iniiwasang sadyâ

noong pandemya'y di makaalis

buti't may tanim kahit kamatis

ipraktis na ang urban gardening

nang balang araw, may pipitasin

alugbati, talbos ng kamote

okra, papaya, kangkong, sayote

magtanim sa maliit mang pasô,

sa lata, gulong na di na buô

diligan lang natin araw-araw

at baka may bunga nang lilitaw

- gregoriovbituinjr.

10.14.2025

* litrato kuha sa Villa Immaculada, Intramuros, Maynila, Oktubre 4, 2025

Tanggalin na ang pork ng mga baboy

TANGGALIN NA ANG PORK NG MGA BABOY

tanggalin na ang pork ng mga baboy

silang dinala tayo sa kumunoy

ng kahirapa't pagiging kaluoy

tanggalin na ang pork ng mga baboy

tanggalin na ang pork ng mga trapo

lalo't masa'y kanilang niloloko

lalo't masa nama'y nagpapaloko

sa mga mayayamang pulitiko

tanggalin na ang pork ng mga iyon

lalo't dulot nito'y pawang korapsyon

sa flood control nina Senador Kotong

at Kongresista Bundat sa paglamon

tanggalin na ang pork ng mga korap

na mga pulitikong mapagpanggap

lalo't baha'y ating kinakaharap

na sa bayan ay talagang pahirap

- gregoriovbituinjr.

10.14.2025

* litrato mula sa kawing na: https://www.facebook.com/photo/?fbid=1243836657790369&set=a.654145666759474 

Proyektong 'ghost' flood control

PROYEKTONG 'GHOST' FLOOD CONTROL

pulos buhangin, konting semento?

sa flood control, o wala nga nito?

bakit baha pa rin sa bayan ko?

bakit 'ghost' ang kanilang proyekto?

di pala climate change ang dahilan

sa flood control kundi kurakutan 

dapat mapanagot ang sinumang

bitukang halang na nagpayaman

konggresista't senador na suspek

na sa pera ng bayan ay adik

dapat sa piitan na isiksik

at huwag tayong patumpik-tumpik

nakaiiyak, nakalulungkot

ang nangyayari't kayraming salot

na lingkod bayang dapat managot

ikulong na lahat ng kurakot

baguhin na ang sistemang bulok 

pagkat kabuluka'y di pagsubok

kundi gawain ng mga hayok

na sa salapi'y pawang dayukdok

- gregoriovbituinjr.

10.14.2025

* litrato kuha sa Luneta sa Maynila, Setyembre 21, 2025

Ang Paghahanap kay Tapat

ANG PAGHAHANAP KAY TAPAT

di ko nabili ang nasabing aklat

dahil bulsa ko'y butas at makunat

napapanahon pa naman ang aklat

pamagat: Ang Paghahanap Kay Tapat

magkakilala kami ng may-akdâ

lumipas na'y tatlong dekada yatà

ngayon, may matagumpay siyang kathâ

si Bert Banico, kaygaling na sadyâ

si Tapat ba'y mahahanap pa? saan?

sa gobyernong pulos katiwalian?

sa DPWH? sentro iyan

ng mga kickback sa pondo ng bayan

sa Senado bang sanay sa insertion?

sa Kongreso bang tadtad ng korapsyon?

sa kontraktor bang malaki ang patong?

sa kapulisang praktis na'y mangotong?

sa mga paring kunwa'y lumilingap?

sa pulitikong tuso't mapagpanggap?

sa mga kabataang nangangarap?

o sa isang mayang sisiyap-siyap?

mukhang siya'y wala sa Pilipinas

sa lupa nina Maganda't Malakas

wala noong panahon pa ni Hudas

si Tapat ba'y nasa Landas ng Wakas?

- gregoriovbituinjr.

10.13.2025

* litrato mula sa google

Paalala sakaling magkalindol

PAALALA SAKALING MAGKALINDOL

naglindol, kayâ payò ng mga kasama

ay huwag manatili sa mga gusaling

gawa ng DPWH at kontraktor

at baka mabagsakan ng kanilang gawâ

dahil sa mga ghost project ng flood control

dahil patuloy pa ring bahâ sa Bulacan

dahil sa korapsyon sa DPWH

wala nang tiwalà ang bayan sa kanila

baka nga pulos substandard na materyales

ang ginamit dahil kinurakot ang pondo

ng bayan, ibinulsa ng mga buwaya

kaya materyales talaga'y mahuhunâ

katiwalian nila'y parang tubig bahâ

hahanap at hahanap ng mapupuntahan

habang ang masa naman ay nakatungangà

walang ginagawâ, hay, walang ginagawâ

Oktubre na, wala pang nakulong na corrupt!

nganga pa rin ba pag dumating ang The Big One?

ikulong na ang mga kurakot! ikulong!

kung maaari lang, bitayin sila ngayon!

- gregoriovbituinjr.

10.13.2025

* litrato mula sa kinasapiang messenger group

Lutang sa hangin

LUTANG SA HANGIN

"Pagsubok ba ng Diyos ang katiwalian?"

aba'y nainis ako't siya'y nasigawan:

"Gawain iyon ng sa gobyerno'y kawatan

na ninakawan nila'y tayong taumbayan!"

nakahiligan niya'y pawang pamahiin

na gawa ng demonyo ang lahat ng krimen

di lapat sa lupa, diwa'y lutang sa hangin

"Pag-aralan mo ang lipunan!" aking bilin

dating adik siyang nais magbagong buhay

ngunit lutang din sa hangin ang gumagabay

dapat kongkretong suri sa kongkretong lagay

ng bayan, aralin ang mga isyu't ugnay

ipagpaumanhin kung nainis sa kanya

bagamat ayos lang naman ang tanong niya

dapat ko lamang pagpaliwanagan siya

ng lapat sa lupang kasagutan talaga

- gregoriovbituinjr.

10.12.2025

Kaming mga tibak na Spartan

KAMING MGA TIBAK NA SPARTAN

kaming mga tibak na Spartan

malulugmok lang sa kamatayan

at di sa anumang karamdaman

na prinsipyo naming tangan-tangan

kaya katawa'y pinatatatag

ang puso't diwa'y di nangangarag

ginagamot ang sariling sugat

lunas ay agad inilalapat

kumakain ng sariwang gulay

nang laman, diwa't puso'y tumibay

sariwang buko ang tinatagay

habang patuloy sa pagsasanay

nabubuhay na kaming ganito

at ganito kami hanggang dulo

tuloy sa paglilingkod sa tao

lalo sa dukha't uring obrero

- gregoriovbituinjr.

10.12.2025

Maging bayani ka sa panahong ito

 

MAGING BAYANI KA SA PANAHONG ITO

maging bayani ka / sa panahong ito

laban sa korapsyon / ng mga dorobo

bahâ sa probinsya't / lungsod nating ito

pagkat ibinulsa / mismo nila'y pondo

ng bayan, trapo ngâ / ang mga kawatan

na 'naglilingkod' daw / sa pamahalaan

aba'y senador pa't / konggresista iyan

at mga kontraktor / ang kasabwat naman

masa'y niloloko / nitong mga hayok

sa salapi, masa'y / di dapat malugmok

subalit di sapat / ang sanlibong suntok

sa mga nilamon / ng sistemang bulok

tuligsain natin / lahat ng kurakot

at singilin natin / ang dapat managot

ipakulong natin / ang lahat ng sangkot

at tiyaking sila'y / di makalulusot

sa panahong ito / ay maging bayani

unahin ang bayan, / at di ang sarili

singilin ang trapong / kunwari'y nagsilbi

panagutin natin / silang tuso't imbi

- gregoriovbituinjr.

10.12.2025

* litrato kuha sa Foro de Intramuros, Oktubre 11, 2025, sa aktibidad ng grupong Dakila

Paglahok sa Black Friday Protest

PAGLAHOK SA BLACK FRIDAY PROTEST

isa lamang ako sa mamamayang galit

ekspresyon ang Black Friday Protest sa paggiit

ng hustisya para sa dukha't maliliit

na tinig ay kayhabang panahong winaglit

panahon nang maparusahan at ikulong

ang mga lingkod bayan daw ngunit ulupong

mga kongresista't senador na nangotong

pati kontratistang ginawa tayong gunggong

kahit ako'y nag-iisa, tiyak lalahok

sa takbo ng kasaysayan nang mailugmok

ang sistemang bulok at pulitikong bugok

nang uring manggagawa'y ilagay sa tuktok

simpleng tibak man ako at abang makata

pag nabago ang sistema'y saka huhupa

ang galit nitong bayan sa trapong kuhila

ngayon, tabak ni Andres muna'y hinahasa

- gregoriovbituinjr.

10.10.2025

Baha sa tapat ng bahay

BAHA SA TAPAT NG BAHAY

kaylalaki ng patak ng ulan

dito pa rin ba'y ghost ang flood control?

tingni, nagbaha na sa lansangan

flood control ba'y paano ginugol?

batid na ng bayan ang korapsyon

na likha ng mga lingkodbayan

talagang loko ng mga iyon

ibinulsa ang pera ng bayan

ay, wala ba silang mga budhi

kung meron man, budhi'y sakdal itim

dapat nang lunurin sa pusali

silang budhi'y kakulay ng uling

sa lumalaban, ako'y saludo

upang mabago na ang sistema

itayo'y lipunang makatao

mga kurakot, parusahan na!

- gregoriovbituinjr.

10.10.2025

* mapapanood ang bidyo sa kawing na: https://www.facebook.com/reel/2353627365076958

Dahil sa misyong dakila

DAHIL SA MISYONG DAKILA

parang araw-araw na lang, lagi akong tulala

subalit dapat ipakita kong ako'y masigla

kahit hindi, sapagkat ako'y isang mandirigma

at nalulutas iyon, dahil may misyong dakila

iyon ang bumubuhay sa akin sa araw-gabi

nakapagpapasigla pa ang pagdalo sa rali

kaya sa anumang laban, di ako nagsisisi

na kabilang ako sa mga sa bayan nagsilbi

tulad ko'y ang mandirigmang Ispartang si Eurytus

na hanggang sa huling sandali'y nakibakang lubos

di gaya ng Ispartang duwag, si Aristodemus

kinahiya ng kanyang lipi, di nakipagtuos

kumikilos pa ako't patuloy na lumalaban

upang tuluyang mapawi ang mga kabulukan

ng sistema't itatag ang makataong lipunan

iyan ang dakila kong misyon hanggang sa libingan

- gregoriovbituinjr.

10.09.2025

BOTO, BOGO, BOFO

BOTO, BOGO, BOFO

Buy One, Take One: BOTO

Buy One, Get One: BOGO

Buy One, Free One: BOFO

iba'y ibang daglat

sa bibilhing sukat

iyan nga ba'y sapat

na pawang pakulô

nang tinda'y lumagô

nang sila'y tumubò

pag binili'y isa

may libre pang isa

may kita na sila

ang BOTO ng masa

sana'y di ibenta

sa tusong burgesya

BOTO mo'y butatâ

pag nanalo na ngâ

ay trapong kuhilà 

- gregoriovbituinjr.

10.09.2025

* litrato mulâ kung saan-saan

Kami'y mga apo ni Leonidas

KAMI'Y MGA APO NI LEONIDAS

kami'y mga apo ni Leonidas

mandirigmang lumalaban ng patas

mandirigma ang tinahak na landas

marangal, sa labanan ay parehas

katulad ko'y Ispartang si Eurytus

maysakit man ay lumaban ng lubos

nang sa Thermopylae, siya'y inulos

hanggang mga mandirigma'y naubos

di gaya ng isang Ispartang duwag

na ang sariling buntot ay nabahag

si Aristodemus na nangangarag

sa digma'y umuwi, di nakibabag

kami'y mga aktibistang Spartan

na laging handâ sa anumang laban

na misyon ay baguhin ang lipunan

nang ginhawa'y kamtin ng buong bayan

- gregoriovbituinjr.

10.07.2025

* litrato mula sa google

Kwento ng dalawang wish

KWENTO NG DALAWANG WISH

nag-ala-Kara David na si Bishop

ngunit iniba lang ang pangungusap

kay Kara, mamatay lahat ng korap

na birthday wish ko na rin sa hinagap

kay Bishop Soc, kung siya'y mamamatay

mga korap sana'y maunang tunay

kina Kara't Bishop, wish nila'y lantay

mula sa pusò, may galit na taglay

poot sa lahat ng mga kurakot

sa kaban ng bayan, dapat managot

bantayan, dapat walang makalusot

ipakita natin ang ating poot

mamatay lahat ng mga tiwali

trapo't dinastiya'y dapat magapi

- gregoriovbituinjr.

10.08.2025

Magwawakas din ang Nakbâ

MAGWAWAKAS DIN ANG NAKBÂ

mulâ ilog hanggang dagat

lalaya rin ang Palestine

gagapiing walang puknat

ang mga hudyong salarin

magwawakas din ang Nakbâ

mananakop ay iigtad

at magiging isang bansâ

silang malaya't maunlad

kaya nakiisa ako

sa pakikibaka nila

narito't taas-kamao

upang sila'y lumaya na

- gregoriovbituinjr.

10.07.2025

* Nakbâ - sa Arabiko ay catastrophe o malaking kapahamakan

Sino bang modelo sa katha kong tulâ?

SINO BANG MODELO SA KATHA KONG TULA?

sino bang modelo sa katha kong tulâ?

gayong pwede rin namang talagang walâ

minsan, pakikiusapan mo ang madlâ

kung pwede ba silang litratuhang sadyâ

madalas din namang bantulot ang masa

sa rali, malilitratuhan talaga

pag ayaw makuhanan, bakit nandyan ka?

lalo't maraming kamera at masmidya

pag may kinunang may plakard, aba'y gusto

pag ayaw, makata na lang ang modelo

na sa pagtula mismo'y nakalitrato

kaysa maghanap pa ng kung sino-sino

pagkat di na pipilitin ang sarili

"hoy, ikaw muna'y maging modelo rini"

sa litkuran o background na sinasabi

upang agad maparating ang mensahe

walang magawa kundi makata na lang

upang yaring tula ay may katibayan

na pag binasa, totoo pala naman

yaong sa tula'y isinasalarawan

- gregoriovbituinjr.

10.07.2025

Resign All!

RESIGN ALL!

iyan ang tindig namin - Resign All!

bulsa ng korap nga'y bumubukol

dinastiya pa'y pinagtatanggol

ng mga kurakot sa flood control

lahat ng korap, dapat managot

korapsyon nila'y katakot-takot

mag-resign na ang lahat ng sangkot

parusahan lahat ng kurakot

kaya huwag na tayong bumoto

sa walang mapagpiliang trapo

pulos kinatawan ng negosyo,

oligarkiya't burgesyang tuso

pinaglaruan ang mamamayan

sa kalunsuran at lalawigan

ibinulsa ng mga kawatan

ang pondong nakalaan sa bayan

kaya mag-resign na silang lahat

RESIGN ALL! ang sigaw nami't sumbat

gobyerno na'y mapanglaw na gubat

serbisyo'y ninenegosyong sukat

- gregoriovbituinjr.

10.07.2025

Guyabano tea

GUYABANO TEA

dahon ng guyabano

at mainit na tubig

paghaluin lang ito

nang lumakas ang bisig

at buo mong kalamnan

na ang lasa'y kaysarap

tanim lang sa bakuran

di na ako naghanap

guyabano na'y tsaa

inumin nang lumusog

paggising sa umaga

o bago ka matulog

tikman, guyabano tea

madaramang lalakas

at di ka magsisisi

kalusugan mo'y wagas

- gregoriovbituinjr.

10.06.2025

Ako'y raliyista

AKO'Y RALIYISTA 

ako'y talagang raliyista

ng higit nang tatlong dekada

na laging laman ng kalsada

patuloy na nakikibaka

upang baguhin ang sistema

magbabago pa ngâ ba ako?

sistema'y binabago ako?

o sistema'y dapat mabago?

hustisya sana ang matamo

ng dukha't ng uring obrero

itatag ang lipunang patas,

may pagkakapantay, parehas

ikulong ang burgesyang hudas,

oligarkiyang talipandas,

dinastiya'y dapat magwakas

tulad kong tibak na Spartan

ay patuloy na lalabanan

ang mga mali't kabulukan 

upang makataong lipunan

ay maitatag nang tuluyan

- gregoriovbituinjr.

10.06.2025

Puna ni Marcelo

PUNA NI MARCELO

anong tinding puna ni kasamang Marcelo

na tanda ko pa't tagos sa diwa't pusò ko

"bakit di ka nila-like ng kolektibo mo?"

punang yumanig sa buo kong pagkatao

noon nama'y di ko iyon iniintindi

katha lang ng katha, sa pagkilos nawili

ngayon lang natantong wala akong kakampi

dumaan ang birthday, wala silang nasabi

ngunit sila'y akin pa ring inuunawà

kaya ganyan sila'y ako rin ang maysalà

kasi ako'y di nila kaututang-dilà

kasi ako'y laging abala sa pagkathâ

salamat, Marcelo, manggagawa sa Rizal

tunay kang kapatid sa rebolusyo't dangal

puna mo'y tama't humihiwang tila punyal

sa pusong nagdugo na't tila ba napigtal

puna mo'y bumaon ng kalalim-laliman 

sa aking pusò bilang tibak na Spartan 

simpleng tanong na sumugat sa katauhan

ito'y punang dadalhin ko hanggang libingan 

- gregoriovbituinjr.

10.06.2025

Pirmi na akong nakatayô sa LRT

PIRMI NA AKONG NAKATAYÔ SA LRT

oo, di ako umuupo sa LRT

dahil mga silya roon ay pambabae

dapat lang maging gentleman kaming lalaki

kaya madalas ako'y tayô sa LRT

nakapagtatakang lalaki'y umuupô

gayong kayrami pang babaeng nakatayô

para bang walang aral ang mga kulugô

na di alam gumalang, sa asal ay hubô

hoy, tila kapara mo'y tusong pulitiko 

na nagpakabundat sa kaban ng bayan ko

aba'y matuto kang tumayo't rumespeto

sa bawat babaeng imahe ng nanay mo

umupo pag may bakante o may sakit ka

may kapansanan o kaya'y matanda ka na

igalang bawat Marya Klara't Gabriela

pag sila'y nakatayô, ibigay ang silya

- gregoriovbituinjr.

10.05.2025

* LRT - Light Rail Transit

* mapapanood ang bidyo sa kawing na: https://www.facebook.com/share/r/1LShmGezqb/ 

Dinastiya, wakasan!

DINASTIYA, WAKASAN!

tama si Mambubulgar

sa kanyang ibinulgar

isang katotohanang

masa ang tinamaan

ang inihalal kasi

ng maraming botante

ay mula dinastiya

mula isang pamilya

iisang apelyido

ang laging binoboto

mga trapong kurakot

na korapsyon ang dulot

upang malutas iyan

DINASTIYA, WAKASAN!

ito'y napapanahon

kung nais ng solusyon

- gregoriovbituinjr.

10.04.2025

* komiks mula sa pahayagang Bulgar, 10.02.2025, p.5

Palayain ang Mendiola 216!

PALAYAIN ANG MENDIOLA 216!

noong Setyembre twenty-one, maraming dukha

ang nasa Mendiola, nakipagbakbakan

na karamihan ay tinedyer, talubata

ekspresyon ng galit sa mga kurakutan

naalala ko ang Nepal at Indonesia

sa kanila, nagkaroon ng pagbabago

sa Nepal, niluklok ng mamamayan nila

yaong unang babaeng pinunong ministro

sa Indonesia, putok na isyu'y pabahay

ng mga mambabatas, sa rali binangga

ng pulisya ang isang rider at namatay

ang kaytinding gulo'y dito na nagsimula

sa bansa, napatay ang isang Eric Saber

na umano'y di naman kasama sa rali

hustisya na'y panawagan, ito na'y murder

habang mga pulis, kayrami nang hinuli

nasa dalawandaan, labing-anim yaong

dinampot ng pulis, ito nga'y kahungkagan

tingin ko, lehitimong galit sa korapsyon

ang ipinakita ng mga kabataan

kaya ngayong Black Friday Protest, aking hiyaw:

palayain na ang Mendiola Two-One-Six!

hulihin ay mga Senador na nagnakaw

sa kaban ng bayan, perang dapat ibalik

- gregoriovbituinjr.

10.03.2025

Oktubre na, wala pa ring nakukulong na corrupt

OKTUBRE NA, WALA PA RING NAKUKULONG NA CORRUPT

wala pa ring nakukulong, Oktubre na

aba'y paikot-ikot lang ang istorya

may ghost flood control project na, may baha pa

binisto ng baha ang korapsyon nila

di lang rising sea temperature ang isyu

di lang pala climate emergency ito

nagbabaha dahil korapsyon ang isyu

ng mga lingkod bayan ngunit dorobo

Oktubre na, wala pa ring nakukulong

na trapong sa katiwalian nalulong

pag dukhang nagnakaw lang ng isang mamon

walang paglilitis, agad ikukulong

habang pag mga mayayaman ang sangkot

may due process pa ang mga nangurakot

baka sa dulo, wala pa ring managot

ganyan pa rin, sistema'y paikot-ikot

- gregoriovbituinjr.

10.03.2025

* kuha sa rali sa Mendiola, 10.02.2025

Nag-birthday sa rali sa Mendiola

NAG-BIRTHDAY SA RALI SA MENDIOLA

National Day of Action Against Oil and Gas ngayon

kaya sa rali sa Mendiola ako'y lumahok 

kaya sinelebra ko ang kaarawan doon

at isinigaw, Ikulong ang mga kurakot!

habang tangan ang central streamer, mga placard

nagtalumpati ang mga kasamang palaban

mula sa kambal na simbahan, kami'y naglakad

may pari pa at madreng lumahok sa lansangan

maraming salamat sa lahat ng nagsilahok

at tinuligsa ang mga trapong nasa tuktok

pati mga senador at kongresman na hayok

pati na ang sistemang bulok at inuuk-ok

"Baha ng Coal at Gas, Wakasan", sigaw ng tao

"Kuryente ay Serbisyo, Huwag Gawing Negosyo!

"Dapat nang wakasan ang mga pang-aabuso

ng mga oligarkiya't korap sa gobyerno!"

makabuluhang pagdiriwang ng kaarawan

ng aktibo't malakas pang tibak na Spartan

ikulong lahat ng kurakot sa ating bayan

itayo ang asam na makataong lipunan

- gregoriovbituinjr.

10.02.2025

* salamat sa mga kumuha ng litrato

Birthday wish ko na rin ang birthday wish ni Kara David

BIRTHDAY WISH KO NA RIN ANG BIRTHDAY WISH NI KARA DAVID

bihira akong mag-birthday wish, 

sa totoo lang ngunit ngayon

ay aking tutularan ang wish

ni Kara David, tunay iyon

"sana mamatay na ang lahat

ng kurakot sa Pilipinas"

sana ang wish na ito'y sapat

nang matayo'y lipunang patas

sana'y lipunang makatao

ay maitayo nang talaga

walang kurakot na totoo

walang burgesya't dinastiya

kaya ang wish ni Kara David

asam ko lang sana'y matupad

sa kaarawan ko'y di lingid

pangarap na ito'y ilahad

- gregoriovbituinjr.

10.02.2025

* unang pic kuha sa Luneta rally, 09.21.2025

* litrato ni Kara David mula sa google

Baligtarin ang tatsulok

BALIGTARIN ANG TATSULOK

dapat na itong maunawaan

ng mga galit na mamamayan

kaytagal na nating panawagan:

baguhin ang bulok na lipunan!

tatsulok na'y baligtarin ngayon

na panawagang napapanahon

sa pagtindi ng isyung korapsyon

at pagnakaw sa kaban ng nasyon

dapat ipaunawang totoo

ano ba ang tatsulok na ito

nasa tuktok, mayayamang tuso,

dinastiya, burgesya, negosyo

mga api ang nasa ibabâ

inapak-apakang maralitâ,

pinagsamantalahang paggawâ,

pesante, babae, vendor, batà 

dapat baligtarin ang tatsulok

patalsikin mga trapong bugok

tapusin na ang sistemang bulok

at dukhâ ang ilagay sa tuktok

pang-aapi'y dapat nang magwakas

tahakin natin ang bagong landas

itayo ang lipunang parehas

nakikipagkapwa, pantay, patas

- gregoriovbituinjr.

10.01.2025

* litrato mula sa google