Panawagan nila'y parusahan na ang mga kurakot!

PANAWAGAN NILA'Y PARUSAHAN NA ANG MGA KURAKOT!

kinunan ko ng litrato nang makita ang panawagan

na "Parusahan ang mga magnanakaw sa ating bayan

at mga kasabwat na Kontraktor, Senador at Kongresman"

ng UP Workers Union, aba'y sang-ayon din ako riyan

ang mga kurakot, pag di naparusahan, babalik din

sa kanilang krimen at karumal-dumal nilang gawain

imbes magsilbi sa bayan, bulsa nila'y pabubukulin

kawawa muli ang bayan sa mga buwayang salarin

kaya dapat parusahan lahat ng mga nasasangkot

at nandarambong sa pondo ng bayan, silang mga kurakot

dapat may mga ulong gumulong, kundi man ay mapugot

parusahan na sila hanggang buto'y magkalagot-lagot

kaybilis ng batas mamarusa pag dukha ang nang-umit

ng isang mamon upang may mapakain sa kanyang paslit

ngunit pag mayayamang bilyon-bilyong piso na'y kinupit

may due process pa ang mga walanghiyang dapat mapiit

- gregoriovbituinjr.

11.10.2025

Bato-bato sa langit

BATO-BATO SA LANGIT

Bato-bato sa langit

Hustisya'y igigiit

Pag ginawâ ay lupit

Sa dukha't maliliit

Kayraming pinilipit

Pagpaslang ang inugit

Due process ay winaglit

Mga buhay inumit

Tulad ng abang pipit

Pag bayan ay nagalit

Sa tokhang na pinilit

Bato man, ipipiit

Nanlaban pati paslit?

Tanong natin ay bakit?

Buhay nila'y ginilit

Ng sistemang kaylupit

- gregoriovbituinjr.

11.09.2025

Pasig Laban sa Korapsyon

Pasig Laban sa Korapsyon

Isang Mabigat na Misyon

Tunay na Dakilang Layon

At Tanggap Natin ang Hamon!

- gregoriovbituinjr.

11.08.2025

* Kinatha at binigkas na tulâ sa Musika, Tulâ at Sayaw sa Plaza Bonifacio, Pasig, 11.08.2025

Plakard sa baybayin

PLAKARD SA BAYBAYIN

sa plakard mababasa ng bayan

nasa baybayin ang panawagan

laban sa mga tuso't gahaman

na nagnakaw sa pondo ng bayan

"Ikulong na 'yang mga kurakot!"

panawagang dapat na'y bangungot

sa mga pulitikong balakyot

silang ngingisi-ngisi ang sagot

magandang batid nating basahin

yaong plakard na nasa baybayin

na panulat ng ninuno natin

sa plakard man ay ating buhayin

tara, sa plakard nati'y isulat

sa baybayin ang islogang lahat

magbabaybayin sa pagmumulat

magbabaybayin sa pagsusulat

- gregoriovbituinjr.

11.07.2025

* litrato kuha sa presscon ng Artikulo Onse sa Club Filipino

Paalala para sa Disyembre 9: International Anti-Corruption Day

PAALALA PARA SA DISYEMBRE 9: INTERNATIONAL ANTI-CORRUPTION DAY

higit isang buwan pa ang palilipasin

ay talagang pinaghahandaan na natin

ang araw laban sa korapsyon at kurakot

na pondo ng bayan ang kanilang hinuthot

batid nating pinaghahandaang totoo

ay yaong araw ng karapatang pantao;

ang nakakatakot ay baka malimutan

ang mismong isyung kinagagalit ng bayan:

ang korapsyon, kurakutan ng mandarambong

sa pondo ng bayan, kaya isinusulong

kilalanin ang araw laban sa kurakot

pandaigdigang araw laban sa balakyot

ang araw bago Universal Human Rights Day

ay ang International Anti-Corruption Day

ito ang isyu ngayon,  at matinding isyu

dapat tayong lumabas sa araw na ito

huwag nating hayaang basta makalampas

ang Disyembre Nuwebe, at huwag lumipas

na parang pangkaraniwang araw, dapat ngâ

tayo'y magrali, kurakot ay matuligsâ

- gregoriovbituinjr.

11.07.2025

Ang paalala sa kalsada

ANG PAALALA SA KALSADA

bakit mo tatawirin ang isang lansangan

kung tingin mo'y magdudulot ng kamatayan

mayroon doong babala, sundin lang iyan

pag nabundol ka ba'y kaylaking katangahan?

huwag sayangin ang buhay, dapat mag-ingat

huwag magyabang na malakas ka't maingat

sasakya'y di lata, katawa'y di makunat

bawat babala'y dapat ipagpasalamat

di ba't kaylaking babala nang binasa mo

ang "Bawal Tumawid. May Namatay Na Dito"

madaling intindihin, wikang Filipino

pag di mo unawa, banyaga ka ba rito?

pag babala: "Bawal bumaba", e, di huwag!

pag babala: "Bawal lumiko", e, di huwag!

pag babala: "Bawal tumawid" e, di huwag!

paano pag "Bawal umutot!" anong tawag?

huwag maging tanga, huwag basta tumawid

may tulay naman, dumaan doo'y matuwid

kung nagmamadali ka, dapat mong mabatid

na bawat paalala'y mag-ingat ang hatid

- gregoriovbituinjr

11.06.2025

Tibuyô

ANG IKATLO KONG TIBUYÔ

natutunan ko kay Itay

ang magtipid sa tibuyô

isang aral iyong tunay

sa puso't diwa'y lumagô

maganda muling simulan

ang magtipid sa tibuyô

sampung piso lang ang laman

na balang araw, lalagô

ikatlo ito sa akin

una'y nasa isang bahay

nasa tatlong libo na rin

nang mapunô iyong tunay

ang ikalawa'y nawalâ

nasa dalawang libo na

noong bahay ay ginawâ

umuwi ako'y walâ na

sana, ikatlong tibuyô

ay mapunô ko ng barya

bente pesos, tigsasampû

tiyagâ lamang talaga

- gregoriovbituinjr.

11.04.2025

* tibuyô - salitang Batangas sa Kastilang alkansya

Pribatisasyon at korapsyon

PRIBATISASYON AT KORAPSYON 

pribatisasyon at korapsyon

kambal na buwayang lalamon

sa bayan, para ring buwitre

o mga ahas na salbahe

masa'y dinala sa ayuda

namayagpag ang dinastiya

sinapribado ang NAIA

tila NHA pribado na

EO 34, 4PH ngâ

na di pala para sa dukhâ

may PAG-IBIG, di pwede walâ

pribatisasyon na ring sadyâ

sa R.A. 12216 ngâ

nasa relokasyon kawawâ

pag bahay ng dukha'y mawalâ

dahil di nagbayad ng akmâ

pati RA 12252

na pinirmahan ng pangulo

99 years upa ng dayo

sa mga lupa natin dito

krisis na ito'y alpasan na

baguhin natin ang sistema

patuloy na mag-organisa

sistemang bulok, alpasan na!

- gregoriovbituinjr.

11.04.2025

* tulang nilikha at binigkas ng makata sa pagtitipon ng mga manggagawa sa UP SOLAIR (School of Labor and Industrial Relations)

Ang buhay ay isang paglalakbay

ANG BUHAY AY ISANG PAGLALAKBAY

ang buhay ay isang paglalakbay
tulad ng kinathang tula'y tulay
sa pagitan ng ligaya't lumbay
sa pagitan ng bulok at lantay
sa pagitan ng peke at tunay

nilalakad ko'y mahabang parang
lalampasan ang anumang harang
pahinga'y adobo at sinigang
muli, lakad sa gubat at ilang
bagamat sa araw nadadarang

tao'y pagkasanggol ang simulâ
sunod mag-aaral mulâ batà
hanggang magdalaga't magbinatâ
ikakasal habang talubatâ
panaho'y lilipas at tatandâ

ang mahalaga rito'y paano
isinabuhay kung anong wasto
lalo na sa pagpapakatao
at pakikipagkapwa sa mundo
habang ginagawa anong gusto

di ang pagkamal ng kayamanan
o ng pribadong ari-arian
na kinurakot sa kabang bayan
yamang pagkatao'y niyurakan
yamang di dala sa kamatayan

- gregoriovbituinjr.
11.04.2025

Machiavellian daw ba ang mga kurakot?

MACHIAVELLIAN DAW BA ANG MGA KURAKOT?

Machiavellian daw ba ang mga kurakot?

sa pulitika'y di dapat lalambot-lambot

leyon at soro ang liderato ng buktot

na dapat masa sa ulo'y kakamot-kamot

masang sunud-sunuran at di pumapalag

bigyan lang ng ayuda, sila na'y panatag

masa'y bubulong, di lantad kung magpahayag

mata'y pipikit kahit maraming paglabag

tulad ng mga tipikal na pulitiko

laging bilugin ang ulo ng mga tao

kahit gumawa ng krimen upang umano

sa mga ambisyong pampulitika nito

kaya nga nagnanakaw sa kaban ng bayan

iyang mga buwayang walang kabusugan

na sa galit ng masa'y walang pakialam

dahil sila'y may kamay na bakal daw naman

dapat ilantad ang gawi ng mga korap

dahil sa bansa, sila ang mga pahirap

mga trapo'y ibagsak ang dapat maganap

upang maitayo ang lipunang pangarap

- gregoriovbituinjr.

11.03.2025

* Ang taga-Florence na si Niccolo Machiavelli ang awtor ng The Discourses, at ng The Prince na political treatise hinggil sa pamumuno

Ikulong lahat ng mga kurakot

IKULONG LAHAT NG MGA KURAKOT

patuloy nating ibulong ang isyu

o kaya'y ipagsigawan na ito

upang maraming makaalam nito

upang sumama sa pagkilos dito

sadyang nakapanginginig mabatid

ang ginagawa nilang paglulubid

ng buhangin na animo'y makitid

ang kaisipan ng masang kapatid

ay, guniguni pala ang flood control

habang mga bulsa nila'y bumukol

katakawan nila'y sadyang masahol

pagkat buhay ng masa'y naparool

tumindi talaga ang kahirapan

pati na pagbabaha sa lansangan

masa'y dinala nila sa kangkungan

bansa'y tinangay nila sa putikan

ang mga tulog pa'y ating gisingin

ang mga gising na'y organisahin

isyung ito'y ipaliwanag man din

sa masang galit nang hustisya'y kamtin

ikulong lahat ng mga kurakot

na pati hustisya'y binabaluktot

ikulong na ang mga trapong buktot

ikulong lahat ng tuso't balakyot

- gregoriovbituinjr.

11.03.2025

Paglaban sa kurakot

PAGLABAN SA KURAKOT

ano pang dapat gawin kundi ang kumilos

laban sa kaapihan at pambubusabos

laban sa sanhi kayâ bayan ay hikahos 

laban sa burgesyang sa masa'y nang-uulos

laban sa mga pulitikong budol-budol

laban sa mga nasangkot sa ghost flood control

laban sa mga trapong ang bulsa'y bumukol

na pondo ng bayan ay ninakaw ng asshole

laban sa buwayang wala nang kabusugan

laban sa buwitreng ugali'y katakawan

laban sa ahas na punò ng kataksilan

laban sa hudas para lang sa kayamanan

O, taumbayan, iligtas ang bansang ito

laban sa pangungurakot ng mga trapo

laban sa pagnanakaw ng buwis at pondo

ng bayan, kurakot ay ikulong na ninyo!

- gregoriovbituinjr.

11.02.2025

* litrato kuha sa Bantayog ng mga Bayani

Luksong baka, luksong baboy

LUKSONG BAKA, LUKSONG BABOY

luksong baka / ang laro ng / kabataan

noong wala / pa ang pesbuk, / kainaman

laro nila / ng katoto / sa lansangan

larong ito / ba'y iyo pang /naabutan?

ngunit iba / ang laro ng / mga trapo

nilalaro'y / pagnanakaw / nitong pondo

ng kawawang / bansa, na di / na sekreto

binababoy / ng kurakot / ang bayan ko

luksong baboy / pala yaong / nilalarò

nitong lingkod / bayang tila / ba hunyangò

habang masa / sa ayuda / inuutô

ninakawan / sila'y di pa / natatantô

lumulukso / ang kawatan / pakunwari

may insersyon, / kickback, lagay / at paihi

kabang bayan / pala yaong / binuriki

bilyong pisong / nakaw, masa'y / dinuhagi

na kung di pa / nagbabaha / sa kalsada

di nabuking / na binaboy / ang sistema

O, bayan ko, / binabahâ / kang talaga

mga trapong / kurakot ay / ikulong na!

- gregoriovbituinjr

11.02.2025

* mga larawan mula sa google

Unang araw ng Nobyembre, 2025

UNANG ARAW NG NOBYEMBRE, 2025

ngayon ang Unang Araw ng Nobyembre

inyo bang ramdam kung may nangyayari?

wala pang nakukulong na salbahe

kurap at tusong pulitiko, GRABE!

'ghost' flood control project ng mga imbi

magmumulto pa ba hanggang Disyembre?

nagtatakipan ba ang mga guilty?

sa ganyan, anong iyong masasabi?

para sa akin, ikulong na iyang

mga kurakot sa pondo ng bayan

baka bumaha muli sa lansangan

ang galit na galit na sambayanan

buti may due process ang mga kupal

pag dukha, kulong agad, di matagal

kung mangyari ang Indonesia't Nepal

dahil iyan sa hustisyang kaybagal

- gregoriovbituinjr.

11.01.2025

Ang emoji, nagsasaya o nagtatawa?

ANG EMOJI, MASAYA O NAGTATAWA?

maselan ang isyu subalit tingnan ang emoji

parang pinagtatawanan ang mga namatayan 

na pamilyang tinokhang, nakatawa ang emoji

"buti nga sa kanila", tila pinagsisigawan

ganyan nilang estilo'y sadyang nakababahalà

nagsasaya nga ba sila o sila'y nagtatawa?

buti pa ang hinlalaki at pusò pagkat tandâ

nito'y batid mo, di tulad ng emoji na HA-HA

maselang isyu, emoji mo'y HA-HA, ano iyan?

parang gustong-gusto nilang pinapaslang ang tao

para bang uhaw sa dugô, wala sa katinuan

gayong editoryal ay isang mahalagang isyu

walang due process, tao'y pinaslang na tila baboy

ang nag-atas ng pagpaslang ngayon na'y nakapiit

habang mga kaanak ngayong Undas nananaghoy

na sana asam na hustisya'y kanilang makamit

- gregoriovbituinjr.

11.01.2025

* ulat mula sa kawing na: https://www.facebook.com/photo/?fbid=1311509767679566&set=a.602294451934438 

Bakas ng kahapon

BAKAS NG KAHAPON

narito't naiwan pa ang bakas

ng nakaraan, ng nakalipas

tulad ng kaalaman ng pantas

kung ano ang kakaharaping bukas

sa bakas man ay may tubig-bahâ

dahil sa mga tiwaling sadyâ

na mga kurakot na kuhilà

kayâ ang bayan ay lumuluhà

hanggang ngayon aking naninilay

di basta magpatuloy sa buhay

na sarili lang isiping tunay

kumilos pag di na mapalagay

maging bahagi ng kasaysayan

at mag-iwan ng bakas sa daan

na sa buhay na ito ay minsan

para sa hustisya'y nakilaban

- gregoriovbituinjr.

11.01.2025

Black Friday Protest, PPM and Edsa Shrine, 10.31.2025

Black Friday Protest, PPM and Edsa Shrine, 10.31.2025

huling araw na ng Oktubre

bukas ay buwan na ng Nobyembre

aba'y wala pa ring nakukulong

na TONGresista at senaTONG

Ikulong na lahat ng mandarambong!

- gregoriovituinjr.

10.31.2025

Black Friday Protest, PPM and Edsa Shrine, 10.31.2025

Pandesal sa bukangliwayway

PANDESAL SA BUKANGLIWAYWAY

naalimpungatan / ng madaling araw

ayaw pang bumangon, / ramdam pa ang ginaw

tila ba nasilaw / nang buksan ang ilaw

bumangon nang merong / ideyang lumitaw

agad isinulat / sa aking kwaderno

ang mga ideya't / samutsaring isyu

mag-uumaga na, / lumabas na ako

bumiling pandesal / doon sa may kanto

habang kayrami pa / akong naninilay

na ang puso't diwa'y / di pa mapalagay

buti't may pandesal / sa bukangliwayway

nakabubusog din / bagamat may lumbay

adhika ko sanang / tula'y isaaklat

bagamat kayraming / tulang bumabanat

sa mga kurakot / na aking nilapat

sa tula na mithi'y / maglinis ng kalat

kalat ng kurakot, / silang mandarambong

sa pondo ng bayan, / TONGraktor, senaTONG

dapat lamang silang / ikulong! IKULONG!

hustisya sa bayan / ba'y saan hahantong?

- gregoriovbituinjr.

10.31.2025

Sa pagtulâ

SA PAGTULÂ

di ko dineklarang bawat araw may tulâ

bagamat iyon na ang aking ginagawâ

inilalarawan ang samutsaring paksâ

saya, rimarim, libog, luha, lupâ, luksâ

maralita, kabataan, vendor, obrero

kababaihan, batà, magbubukid, tayo

pagtulâ na kasi'y pinakapahinga ko

mula tambak na gawain, laksang trabaho

tulâ ng tulâ, sulat ng sulat ng sulat

nagbabakasakaling ang masa'y mamulat

kumilos laban sa mga nangungulimbat

ng pondo ng bayan, mga korap na bundat

ako'y tutulâ ng nasa diwa't damdamin

tula'y tulay sa pagtulong sa bayan natin

- gregoriovbituinjr.

10.30.2025

Pagkawalâ

PAGKAWALÂ

ngayong nawalan na / ako ng asawa

sinong mag-uulat / na ako'y nawalâ

dinukot ninuman / dahil aktibista

ika ni Gat Andres, / walâ na ngâ, walâ

tuloy pa rin ako / sa bawat pagkilos

nang masa'y mamulat / sa prinsipyong yakap

upang manggagawà / at kapwa hikahos

ay magsikilos na't / makulong ang korap

mahahalata mo / pag winalâ ako

pag tulang tulay ko'y / di na natunghayan

sa umaga't gabi / ng mga katoto

oo, tanging tulâ / ang palatandaan

may habeas corpus / nang ako'y mahanap

o kung di na buhay, / makita ang bangkay

bigyan ng marangal / na libing, pangarap 

kong tulang kinatha'y / inyo pang matunghay

- gregoriovbituinjr.

10.30.2025    

Due process

DUE PROCESS

"At ang hustisya ay para lang sa mayaman..."

- mula sa awiting Tatsulok ng Buklod

buti ang mayaman, may due process

kahit ang ninakaw na'y bilyones

pag mahirap, nagnakaw ng mamon

dahil anak umiyak sa gutom

walang nang due process, agad kulong

- gregoriovbituinjr.

10.29.2025

* mapapanood ang pagbigkas ng tula sa kawing na: 

https://www.facebook.com/reel/1474105757002674 

Buwaya at buwitre

BUWAYA AT BUWITRE

di ako mapakali

sa mga nangyayari

buwaya at buwitre

pondo ang inatake

kawawa ang bayan ko

sa mga tusong trapo

ninanakaw na'y pondo

tayo na'y niloloko

sadyang kasumpa-sumpà

ang pinaggagagawâ

ng mga walanghiyâ

kayâ galit ang madlâ 

pinagsamantalahan

nila ang taumbayan

sila pang lingkod bayan

yaong mga kawatan

pangil nila'y putulin

kuko nila'y tanggalin

sistema nila'y kitlin

kahayupa'y katayin

tangi kong masasabi

ang punta ko'y sa rali

magpoprotesta kami

laban sa mga imbi

- gregoriovbituinjr.

10.28.2025

* litrato kuha sa baba ng Edsa Shrine, 10.24.2025

Ang punò at ang dukhâ

ANG PUNÒ AT ANG DUKHÂ

putulin mo ang punò, may nananahang luluhà

paruparo, ibon, inakay na inaarugâ

tanggalan mo ng bahay, luluhà ang maralitâ

magulang, magkapatid, may tahanang mawawalâ

puno'y may ugat, sanga, bunga, dahong malalagô

sibakin mo't kalikasan ay tiyak manlulumò

bahay ay may ina, ama, anak, pamilyang buô

tanggalan mo ng bahay, baka dumanak ang dugô

pag nawalâ ang punò, babahain kahit bundok

tiyak guguho ang mga lupang magiging gabok

pag nawalan ng bahay, di iyon isang pagsubok

kundi ginipit ng mga mapaniil at hayok

ang punò at ang dukha'y para bagang magkapilas

na bahagi ng kalikasang iisa ang landas

idemolis mo't may dadanak na dugô at katas

kaya dapat asamin natin ay lipunang patas

- gregoriovbituinjr.

10.28.2025

Klima at korapsyon

KLIMA AT KORAPSYON

gusto ko talaga ang panahong

di ako nagdadala ng payong

kundi sumbrero ang pananggalang

sa kainitang nakadadarang

ngunit nagbabago na ang klima 

ang panahon ay di na matimpla

salà sa init, salà sa lamig

tag-init ngunit nangangaligkig

damang-dama ang katotohanang

di pala climate change ang dahilan

ng pagbaha kundi ghost flood control

bulsa ng kurakot nga'y bumukol

naglipana'y buwaya't buwitre

pondo ng bayan ang inatake

ang krimen nila'y nakamumuhi

salbaheng kay-iitim ng budhi

kongresong punô ng mandarambong

senadong kayraming mangongotong

mayaman nating bansa'y naghirap

pagkat namumuno'y mga korap 

- gregoriovbituinjr.

10.28.2025

Habang lulan ng traysikel

HABANG LULAN NG TRAYSIKEL

nagninilay / habang lulan / ng traysikel

hinahabol / daw ako ng / tatlong anghel

ibalik ko / ang hiram na / gintong pitsel

papalitan / daw ng isang / gintong pinsel

nagkamali / lang daw sila / ng padala

dahil ako'y / nagsusulat / pinsel pala

katoto ko'y / may natanggap / na lamesa

habang isang / kaibigan / ay may silya

sa traysikel / may babalang / h'wag umutot

'kako naman / ikulong na / ang kurakot

Tongresman man, / senaTONG man, / mga buktot

dapat sila'y / di talaga / makalusot 

ito'y aking / layon, sadya / kong gagawin

ang magsulat / ng totoo't / tuligsain

ang gahamang / dinastiya't / mga sakim

yaong isip / na tulog pa / ay pukawin

- gregoriovbituinjr.

10.27.2025

* mapapanood ang bidyo sa kawing na: https://www.facebook.com/reel/2210334546109737

Palakad-lakad

PALAKAD-LAKAD

ay, palakad-lakad pa rin ako

parang Samwel Bilibit na Hudyo

o sa Ingles ay The Wandering Jew

ngunit ako'y maka-Palestino

kayraming isyu ang nakikita

sa rali'y lumalahok tuwina

ang sigaw ng madla'y nadarama

kurakutan, sobra na, tama na!

tuloy-tuloy lang sa paglalakad

lipunang makatao ang hangad

at ang tatsulok ay mabaligtad

lalo't karukhaa'y nakatambad

maraming nakasulat sa pader

na panawagan sa nasa poder

sobra na, tama na ang pag-marder

sa demokrasya ng mga Hit-ler!

"Sahod Itaas! Presyo Ibaba!"

"Ikulong ang Kurakot sa bansa!"

"Panagutin ang mga Kuhila!"

sigaw na huwag ibalewala

- gregoriovbituinjr.

10.26.2025

* litrato kuha sa Commonwealth Ave., Lungsod Quezon, Oktubre 15, 2025

Sa kagubatan ng kalunsuran

SA KAGUBATAN NG KURAKUTAN

minsan, daga'y nagtanong sa leyon:

"Ano pong suliranin n'yo ngayon

baka lang po ako'y makatulong

buti't niligtas n'yo ako noon

sa buwaya, di ako nilamon."

anang leyon sa dagang lagalag:

"Kagubatan natin ay madawag

proyekto ng tao rito'y hungkag

parang flood control, di ka panatag

pondo'y ninakaw, batas nilabag."

"Anong panglaw ng kinabukasan

ng bayang tigib ng kurakutan

animo'y tinik sa kagubatan

iyang korapsyon sa kalunsuran

umuusok hanggang kalangitan"

"Parang ahas sa gubat na ito

kayraming buwaya sa Senado

kayraming buwitre sa Kongreso

nabundat ang dinastiya't trapo

kawawa ang karaniwang tao."

napatango na lamang ang dagâ

ngayon ay kanya nang naunawà

kung bakit kayraming mga dukhâ

sa lungsod niyang tinitingalâ

pasya n'ya'y manatili sa lunggâ

- gregoriovbituinjr.

10.26.2025

Tanong: Magnanakaw; Sagot: Senador?

TANONG: MAGNANAKAW; SAGOT: SENADOR?

Tanong - Apat Pababa: Magnanakaw

pitong titik ang KAWATAN, SENADOR

anong sagot kayang tamang ilagay?

di naman pitong titik ang KONTRAKTOR

sa tindi ng garapalan sa badyet

pinatindi ng isyung ghost flood control

sagot dito'y maaaring masakit

ngunit bayan ay baka di tututol

magagalit ba ang mga senador?

sa aking sagot sa palaisipan?

o ang ituturo nila'y kontraktor?

sadyang kaysakit ng katotohanang:

di climate change ang dahilan ng bahâ

kundi kabang bayan ay kinurakot

ng mga trapong binoto ng madlâ

mga kawatang dapat lang managot

sa pondo ng flood control, sila'y paldo

Senador Kawatan, bundat na bundat

pati mga buwaya sa Kongreso

dapat mandarambong makulong lahat

- gregoriovbituinjr.

10.25.2025

* krosword mula sa Abante Tonite, Oktubre 25, 2025, p.7

Ikulong na 'yang mga kurakot!

IKULONG NA 'YANG MGA KURAKOT!

sigaw ng masa'y di malilimot:

"Ikulong na 'yang mga kurakot!"

na kaban ng bayan ang hinuthot

ng buwaya't buwitreng balakyot

sa masa'y dapat silang matakot

galit na ang masa sa kurakot

katarungan sana'y di maudlot

kurakot sana'y di makalusot

kaylaking sala ng mga buktot

na lingkod bayang dapat managot

hustisya'y kanilang binaluktot

dapat talagang may mapanagot

TONGresista't senaTONG na buktot

silang mga naglagay ng ipot

sa ulo ng bayan na binalot

ng lagim nilang katakot-takot

kahayupang sa dibdib kaykirot

na gawa ng trapong mapag-imbot

paano ba natin malalagot

ang sistemang bulok at baluktot

parusahan ang lahat ng sangkot

ikulong silang mga balakyot

parusahan ang lahat ng buktot

IKULONG NA 'YANG MGA KURAKOT!

- gregoriovbituinjr.

10.25.2025

Thermopylae - sa tarangkahan ng apoy

THERMOPYLAE - SA TARANGKAHAN NG APOY

noon, nakipagdigmaan kami

sa tarangkahan ng apoy, sabi

nila'y iyon daw ang Thermopylae

doon buhay nami'y nakaugnay

kabilang ako sa tatlong daang

mandirigmang tawag ay Spartan

sa matinding labanan bumagsak

upang pasibulin ang pinitak

sa lupaing ayaw na isukò

sa kaaway, dumanak ma'y dugô

lumaban at hinawan ang landas

tungò sa isang malayang bukas

kami ang mandirigma ng apoy

muling lalaban kaysa managhoy

para sa kapakanan ng lahi

para sa kagalingan ng uri

sa makabago mang Thermopylae

Eurytus akong lalabang tunay

upang palayain itong bayan

sa mapagsamantalang iilan

- gregoriovbituinjr.

10.25.2025

* mapa ng Thermopylae mula sa google

Tulâ na lang ang mayroon ako

TULÂ NA LANG ANG MAYROON AKO

tulâ na lang ang mayroon ako

hayaan n'yong iambag ko ito

para sa maralita't obrero

para sa buti ng bansa't mundo

huwag sanang hayaang mawalâ

ang aking kakayahang kumathâ

ang pagiging makatâ ng dukhâ

ang pag-ibig ko sa mutya't tulâ

ang mayroon ako'y tulâ na lang

hayaang masa ang makinabang

na parang mga tanim sa parang

na parang tanghalian sa dulang

tulâ mang sa plakard isinulat

upang maraming masa'y mamulat

taos akong nagpapasalamat

sa mga tumangkilik, sa lahat

- gregoriovbituinjr.

10.24.2025

* litrato kuha sa Edsa Shrine, 10.24.2025        

Ngayong Black Friday Protest

NGAYONG BLACK FRIDAY PROTEST

salamat sa lahat ng mga nakiisa

sa pagkilos kahit ako lamang mag-isa

may nakausap nga ako't ako'y ginisa

ngunit di natinag sa kanyang pang-iisa

ganyan kaming mga aktibistang Spartan

minsan, solong diskarte lang ang may katawan

mahalaga, misyon ay isakatuparan

tulad ng Black Friday Protest kanina lamang

mabuhay kayong lahat, O, mga kasama

magpatuloy pa tayo sa pakikibaka

at ating baguhin ang bulok na sistema

nang kamtin ng bayan ang asam na hustisya

- gregoriovbituinjr.

10.24.2025

* litrato kuha sa harap ng NHA, 10.24.2025

Ang plakard na patulâ

ANG PLAKARD NA PATULÂ

patula ang plakard ng makatâ

na sa rali bibitbiting sadyâ

pagsingil sa korap at kuhilà

narito't basahin ang talatà:

Oktubre'y matatapos nang ganap

Wala pang nakukulong na korap

Trapong kurakot at mapagpanggap

Sa bayan ay talagang pahirap

- gregorivbituinjr.

10.24.2025

* talata - kahulugan din ay saknong pag tulâ

Sa bayan ng mga kurakot

SA BAYAN NG MGA KURAKOT

nakilala ang bayan ng mga kurakot

dahil sa buwaya't buwitreng nanunulot

ng proyektong flood control na katakot-takot

ang bilyones na perang kanilang nahuthot

mga bata'y di makapasok sa eskwela

dahil dadaanan nila'y bahâ talaga

bahâ paglabas pa lang ng tahanan nila

bahâ pagpasok pa sa trabaho ni ama

ano nang nangyari sa proyektong flood control

na sana'y di binabahâ ang mga pipol

di sa flood control, sa pansarili ginugol

kabang bayan ay dinambong ng mga ulol

ang kakapal ng mukhâ ng mga kurakot

nagpayaman sa pwesto, kaban ay hinuthot

sa bilyones na ninakaw sila'y managot

dapat silang makulong at di makalusot

nagbabahâ pa rin sa maraming probinsya

at kalunsuran dahil sa ginawa nila

proyektong bilyon-bilyon ay naging bulâ na

sinagpang ng walang kabusugan talaga

napakinggan ng bayan ang mga kontrakTONG

sa harap ng TONGresista't mga senaTONG

inamin nilang sa badyet ay may insersyon

sigaw ng bayan: lahat ng sangkot, IKULONG!

- gregoriovbituinjr.

10.23.2025

* litrato kuha sa Luneta, Setyembre 21, 2025

Minimum Wage sa mambabatas, Living Wage sa manggagawa

MINIMUM WAGE SA MAMBABATAS, LIVING WAGE SA MANGGAGAWA

saludo kina Eli San Fernando at Renee Co

sa panawagang minimum wage na sa solon sweldo

tunay silang lingkod bayan ng karaniwang tao

sa kanila'y nagpupugay akong taaskamao!

kayang mabuhay sa minimum wage ng mambabatas

kahit sa kongreso't senado, bangko'y binubutas

ngunit magsisipag kayâ ang trapong talipandas?

na gawin ay batas na para sa lahat ay patas?

kayang mabuhay sa minimum wage ng kongresista

tongpats o insersyon sa badyet ba'y mawawala na?

o kailangan talagang baguhin ang sistema?

nang mawala na ang pulitikal na dinastiya!

ngunit di sapat ang minimum wage sa manggagawà

lalo't buhayin ang mundo ang tungkuling dakilà

silang gulugod ng ekonomya ng bawat bansâ

ngunit sila pang manggagawà ang nagdaralitâ

kayâ sigaw ng manggagawà ay SAHOD ITAAS!

ay di pa dahil wala sa minimum wage ang sahod

kundi mas mataas sa minimum wage ay maabot

kayâ LIVING WAGE ang sinisigaw nilang madalas

iyang LIVING WAGE nga'y nakasulat sa Konstitusyon

mawalâ ang political dynasty pa'y naroon

subalit di naman naisabatas hanggang ngayon

ay, iyan pa kayang minimum wage para sa solon?

- gregoriovbituinjr.

10.22.2025

Salamat, Bianca, sa iyong pag-alala

SALAMAT, BIANCA, SA IYONG PAG-ALALA

salamat, Bianca Umali, sa concern mo

doon sa NAIA sa laksang pasahero 

na nakita mong nakaupo lang sa sahig

gayong sementong iyon ay sadyang kaylamig

anya, sana'y may pansamantalang upuan

para sa nanay, lola't batang kababayan

tagos sa buto ko ang kanyang pakiusap

na sana namamahala'y gawin nang ganap

nakapagtatakang di iyon naiisip

ng namamahala, di ba nila nalirip

kung saan uupo ang mga bibiyahe

sana sila'y di manatiling bulag, bingi

silya't gamit ay pansamantalang inalis

upang konstruksyon daw ng NAIA'y bumilis

subalit nasa sahig, naghihintay ng flight

ang mga pasahero't ganyan ang naging plight

salamat, Bianca, sa iyong malasakit

at karapatang pantao'y iyong giniit

pakiusap na sa gitna ng pagbabago

dapat di profit ang tingin sa pasahero

- gregoriovbituinjr.

10.22.2025

* ulat mula sa pahayagang Pang-Masa at Pilipino Star Ngayon, Oktubre 21, 2025

Aga, iga, ugâ

AGA, IGA, UGÂ

ilang lindol na ba ang nagdaan?

ilang lungsod na ba ang binahâ?

ilang senaTONG na ang kawatan?

ilang flood control ang di nagawâ?

dapat kay-aga nating mabatid

anumang sakunang paparating

anumang mangyari sa paligid

dahil may instrumentong magaling

kailan ba baha'y maiiga?

kung maayos na ba ang flood control?

pag-uga'y dapat paghandaan na

ay, dapat makaiwas sa lindol

tayo'y marapat magtulong-tulong

pag matinding pag-uga'y dumatal

paghandaan saan magkakanlong

paghahanda'y sa diwa ikintal

- gregoriovbituinjr.

10.21.2025

Sa hagupit ng kalikasan at pulitiko

SA HAGUPIT NG KALIKASAN AT PULITIKO

tumitindi ang hagupit ng kalikasan

at pulitikong binoto ngunit kawatan

sa baha't lindol, mag-ingat ang taumbayan

trapong kawatan na'y dakpin at parusahan

sa kalikasan, masa'y may adaptasyon pa

at mitigasyon ngunit ingat din talaga

maghanda sa mangyayari't mananalasa

lindol at pagbaha'y paghandaan ng masa

ang kinupitang ghost flood control na proyekto

buwis ng bayan ang kinawat na totoo

aba'y sabay-sabay nilang dinedelubyo

ang bansang Pilipinas, aray ko! aray ko!

di lamang basta milyon, kundi bilyon-bilyon

ang nakaw ng mga buwayang mandarambong

ng mga TONGtraktor, TONGresista't senaTONG

kawatang dapat nang managot at makulong!

ay, sadyang kaylupit ng kanilang hagupit

dapat lang ang bayan ay talagang magalit

ibagsak silang sa kabang bayan nangupit

at tiyakin ding di sila makapupuslit

- gregoriovbituinjr.

10.21.2025

Di man ako sinamahan

DI MAN AKO SINAMAHAN

siyang tunay, di nila ako sinamahan

baka tingin nila ako'y nang-uuto lang

subalit itinuloy ko ang panawagan

dahil kung hindi, ito'y isang kahihiyan

baka sabihin nila, "Wala ka pala, eh!"

at malaking dagok ang kanilang mensahe

subalit tulad kong sa masa'y nagsisilbi

pinakitang may isang salita't may paki

baka sila'y abala sa sariling buhay

baka ako'y inaasahan silang tunay

baka sila'y abala sa kanilang bahay

baka ako kasi'y pulos lang pagninilay

baka ako'y lihim na kinukutya nila

isang makatang walang kapag-a-pag-asa

kaya napagpasyahan kong kahit mag-isa

tuloy ang laban, tuloy ang pakikibaka

ayos lang, walang samaan ng loob dito

pagkat mahalaga'y may nagagawa tayo

aking ipagtatapat, ito ang totoo:

inangkin ko na'y laban ng dukha't obrero

- gregoriovbituinjr.

10.20.2025

* kuha sa tapat ng NHA, Oktubre 17, kasabay ng International Day for the Eradication of Poverty