Ano raw propesyon ko?

ANO RAW PROPESYON KO?

nag-fill up the form ako doon sa dentista

subalit natigilan ako sa tanong na -

profession: inhinyero, doktor, abogado

empleyado, guro, hardinero, bumbero

architect, baker, chief executive officer

accountant, art director, chef, civil engineer

tanong ni Leonidas, "what is your profession?"

"Ahu! Ahu!" tatlong daang kawal tumugon

nais ko lang namang magpapasta ng ngipin

pagsagot sa form ay akin pang iisipin

doon sa others, ang naisagot ko na lang

ay writer, imbes na aktibistang Spartan

ano nga bang propesyon ko? full time activist

di engineer, actor, chef, o data analyst

pastahan kaya ako pag iyon ang sagot?

o pag nagsabi ng totoo'y malalagot?

- gregoriovbituinjr.

09.10.2024

Paralegal at laban ng dukha

PARALEGAL AT LABAN NG DUKHA

oo, inaamin ko, di ako magaling

halimbawa, sa paralegal na usapin

kayraming batas at butas ang aaralin

mga pasikot-sikot nito'y aalamin

anong mga nanalo at natalong kaso?

laban ng dukha'y paano maipanalo?

sa pamamagitan lang ba ng dokumento?

at nakapanghihikayat na argumento?

kung mga dukha'y tinaboy ng demolisyon

dahil walang dokumentong kanila iyon

sa papel pa lang, talo na, paano ngayon?

hahayaang parang dagang mataboy doon?

pera pa ng burgesya kapag naglabasan

pulis at hukuman ay baka masuhulan

mga walang-wala'y paano pa lalaban?

kundi kapitbisig ang tanging kasagutan

dapat mga dukha'y organisahing lubos

turuan bakit sistema'y dapat makalos

bakit lipunang ito'y di kampi sa kapos

at bigyang aral sa kolektibong pagkilos

minsan, di makukuha sa usaping legal

ang panalo laban sa burgesyang animal

panalo ng Sitio Mendez ay isang aral

sama-samang pagkilos, pagbawi ng dangal

- gregoriovbituinjr.

09.09.2024

Nais ko'y kalayaan

NAIS KO'Y KALAYAAN

nais ko'y kalayaan

ng bayan, uri't masa

laban sa kaapihan

at pagsasamantala

ng kuhila, gahaman

at tiwaling burgesya

ang aming panawagan:

baguhin ang sistema

aming pinapangarap

ang paglaya ng tao

laban sa pagpapanggap

ng dinastiya't trapo

pinairal nang ganap

negosyo, di serbisyo

silang di nililingap

ang dalita't obrero

nais ko'y kalayaan

ng uring manggagawa

palayain ang bayan

lalo ang mga dukha

- gregoriovbituinjr.

09.07.2024

Pagbaka para sa alternatiba

PAGBAKA PARA SA ALTERNATIBA

tadtad na ng pagsasamantala

at laksang kaapihan ang masa

dahil din bulok na ang sistema

marapat lang may alternatiba

laksa-laksa ang nahihirapan

habang may bilyonaryong iilan

di lang ang kalaban ay dayuhan

kundi mga tusong kababayan

ugat ay pribadong pag-aari

kaya mapang-api'y nagwawagi

dapat ibagsak ang hari't pari

nang paghahari'y di manatili

dapat mayroong pagkakapantay

ng kalagayan ng ating buhay

walang mayaman o dukhang tunay

kundi nililingap tayong sabay

kaya sistema'y dapat baguhin

pagpapakatao'y pagyamanin

pakikipagkapwa'y pairalin

alternatibang sistema'y kamtin

- gregoriovbituinjr.

09.07.2024

Edgar Jopson

EDGAR JOPSON

(Setyembre 1, 1948 - Setyembre 21, 1982)

matanda si Dad ng pitong taon kay Edjop

trese anyos ako nang mapatay si Edjop

pareho kaming taga-Sampaloc, Maynila

napakabata ko noong siya'y mawala

anang ulat, siya'y binaril nang tumugis

ang kasama niya'y nakawalang mabilis

bata pa lang ay alam ko na iyang Jopson

di si Edjop, kundi groserya nila noon

minsan, sa Jopson supermarket sa Bustillos

kami ni ama namimili pagkatapos

naming magtungo sa simbahan ng Loreto

panahong nasa elementarya pa ako

tulad ni Edjop, ako'y naging aktibista

na animo'y sumusunod sa yapak niya

gawain ko'y magsulat, bumanat, magmulat

makauring prinsipyo'y ikalat sa lahat

Edgar Jopson, taaskamaong pagpupugay

dapat pangarap nati'y maipagtagumpay

asam na lipunang makatao'y matayo

at sa ipinaglalaban ay di susuko

- gregoriovbituinjr.

09.02.2024

* ang litrato ay selfie ng makatang gala sa loob ng Bantayog ng mga Bayani, ilang taon na ang nakararaan

Buhay-kalye

 

BUHAY-KALYE

kaytindi ng kahirapan sa buhay-kalye

na upang makakain ay pulos diskarte

nang sa pangangalakal sila'y maitaboy

aba'y lalo silang nagmistulang palaboy

dati'y nakakakain pa sila ng pagpag

ngunit ngayon, gutom sila buong magdamag

dukhang walang lamon, sikmura'y kumakalam

habang ang mayamang aso'y busog sa ulam

dapat pagbutihin ang pagkakawanggawa

mulatin at organisahin silang dukha

ipakitang sila'y may magagawa pa rin

kung kikilos sila'y may ginhawang kakamtin

bahaghari'y lilitaw matapos ang unos

di lahat ng panaho'y panahong hikahos

may araw ding sisilay matapos ang bagyo

mabubusog din sa kangkong na inadobo

- gregoriovbituinjr.

08.30.2024

* larawan mula sa magasing Liwayway, Agosto 2024, pahina 29, kung saan nakasulat sa malalaking letra: "Naisip ni Biboy, sana ay hindi na niya kailangang umasa sa mga itinapong pagkain ng iba. Iyong sana ay masaya ring kasama ang kaniyang ama't ina. At sana ay hindi na niya kinakailangang umasa sa sariling diskarte para malamnan ang sikmura."

Pulang tshirt

PULANG TSHIRT

mare-redtag ba ako kung suot ko'y pula?

o dahil simbolo ng pag-ibig ang pula?

di ba't watawat ng Katipunan ay pula?

di ba't sa bandila ng Pinas ay may pula?

tatak ng tshirt ni misis ay Baguio City

na noong naroon kami'y aming nabili

tatak naman ng tshirt ko ay Ka Leody

suot ko nang tumakbo siyang presidente

bughaw ang kulay ng langit at karagatan

luntian ang bundok, parang, at kabukiran

puti'y kapayapaan, itim ay karimlan

pula ang dugo ng sinumang mamamayan

sa kulay ng dugo makikitang malusog

kulay din ng galit at digmaang sumabog

kulay ng tapang upang bansa'y di madurog

salamat sa kulay pulang sa atin handog

- gregoriovbituinjr.

08.28.2024

Arestado?

ARESTADO?

kung si Pastor Quiboloy, alam ni Duterte

kung saan nagtatago, ano ang mensahe?

di mahuli-huli ng pulis, D.I.L.G.

at siya pa'y aarestuhin ng I.C.C.

ayon kay J. Antonio Carpio, retired Justice

may ilalabas umanong warrant of arrest

kay Duterte, na nag-atas sa mga pulis

na ang mga suspek sa drug war ay matugis

ang mga salitang extra-judicial killing

na pumalit sa 'salvage', maging ang tokhang din

ay naging palasak na salita sa atin

batid ng bayan kung sinong dapat usigin

mga samahan sa karapatang pantao

ay tiyak inabangan ang balitang ito

dahil mga pagpaslang ng walang proseso

ay kawalang hustisya't isang pag-abuso

kayraming ina pa ring ngayo'y lumuluha

dahil mahal nila sa buhay ay nawala

ang E.J.K. at tokhang nga'y kasumpa-sumpa

hiling nilang hustisya'y makamtan nang sadya

- gregoriovbituinjr.

08.19.2024

* ulat mula sa pahayagang Bulgar, Agosto 16, 2024, p. 1 at 2

Mag-inang natutulog sa bangketa

MAG-INANG NATUTULOG SA BANGKETA

natutulog sa bangketa silang mag-ina

na habang lulan ng dyip ay aking nakita

kalsada na ba ang tahanan ng pamilya

dahil ba sa hirap ay doon na tumira?

pasimple ko silang kinunan ng litrato

sa kanila'y walang magawa ang gobyerno?

kundi bigyan ng limos o ayuda ito?

imbes na paalwanin ang buhay ng tao?

bakit walang magawa ang pamahalaan?

sa mga naghihirap nating mamamayan?

silang mga matakaw sa kapangyarihan

na nais lang gawin yata'y katiwalian!

dahil utak negosyante ang namumuno

na nais lang mangyari'y paano tumubo

serbisyo'y ninegosyo ng trapong hunyango

gayong "pinuno" silang di dapat maupo

pag daw maraming pulubi sa isang bansa

ang gobyerno raw nila'y walang ginagawa

gobyernong walang paki sa buhay ng dukha

ay dapat sama-samang ibagsak ng madla

- gregoriovbituinjr.

08.18.2024

* litratong kuha ng makatang gala sa Roces Avenue sa Lungsod Quezon, Agosto 16, 2024

Dalawang nawawalang tibak

DALAWANG NAWAWALANG TIBAK

dalawa na namang / aktibista yaong / umano'y dinukot

ng mga tauhan / ng isang ahensyang / baka nga kasangkot

ang ganitong gawang / kriminal ay sadyang / nakakahilakbot

dalawang tibak na'y / desaparesido... / ah, nakatatakot!

sina Gene de Jesus / at Dexter Capuyan / ang dalawang tibak

nagpasaklolo na / sa Korte Suprema / ang mga kaanak

hiling ng pamilya / ay maligtas sila't / di na mapahamak

ang writ of amparo / at habeas data'y / hiling na tiniyak

ang writ of amparo / ay isang remedyo / para sa nalabag

nilang karapatan, / buhay, kalayaan, / maging seguridad

ng sinumang tao, / taga-gobyero man, / simpleng indibidwal

konstitusyonal na / karapatan naman / ang habeas data

upang magkaroon / ng akses sa impo / hinggil sa kanila

kung nasaan sila? / saan ikinulong? / mailabas sila

kinaroroonang / selda, tagong silid / ay di dapat malingid

sa pamilya nilang / ang hirap ng loob / ay di napapatid

tinortyur ba sila? / patay na ba sila? / ay dapat mabatid

palayain sila! / ito ang magandang / mensaheng ihatid

- gregoriovbituinjr.

08.16.2024

* ulat mula sa pahayagang Remate, Agosto 15, 2024, p.8

Sigaw ng Taumbayan: Sweldo ng Mambabatas, Bawasan!

SIGAW NG TAUMBAYAN: 

SWELDO NG MAMBABATAS, BAWASAN!

sa isang artikulong showbiz sa Bulgar na pahayagan

ay nakapukaw agad ng pansin ang pamagat pa lamang:

"Sigaw ng Madlang Pipol: Sweldo ng Mambabatas, Bawasan!"

showbiz ngunit pulitikal ang laman, aba'y kainaman

artista kasi ang asawa ng pinuno ng Senado

kaya nga pinupusuan na rin ng showbiz si Heart mismo

local holidays ay nais bawasan ni Chiz Escudero

kayrami raw holidays sa bansa, dapat bawasan ito

sagot ng madla: Ang bawasan n'yo'y sweldo ng mambabatas!

ang mababawas ay ilagay sa bawat kilo ng bigas

baka mapababa rin ang presyong pataas ng pataas

bumaba ang presyo ng kamatis, galunggong at sardinas 

iparehas ang sweldo ng mambabatas sa manggagawa

minimum wage plus seven hundred fifty pesos, ipasa nga!

mambabatas sana'y pakinggan ang panawagan ng madla

at ipakita nilang sila'y tunay na kumakalinga

- gregoriovbituinjr.

08.15.2024

* ulat mula sa pahayagang Bulgar, Agosto 14, 2024, p.7

Yes sa wage increase!

YES SA WAGE INCREASE!

sa tanong nilang "Pabor ka ba sa wage increase?"

OO ang sagot ng obrerong mapagtiis

HINDI sa kapitalistang mapagmalabis

at HINDI rin sa negosyanteng mapantikis

anong klaseng tanong iyan? nakamumuhi!

pinakita lang nilang wala silang budhi

sa kayod-kalabaw na manggagawa kundi

ang mga tusong negosyante'y ipagwagi

kung obrero ka't nag-HINDI, aba'y gago ka!

tataasan ka na ng sahod, ayaw mo pa?!

kung kapitalista kang nag-OO, santo ka

lalamunin ka ng ibang kapitalista

tanga lang ang aayaw sa umentong iyon

kung obrero kang sa hirap at utang baon

kaya bakit Wage Board iyan ay itinanong

sila nga ba'y makakapitalista't buhong?

kapitalista'y palamunin ng obrero

kaya may tubo dahil sa nagtatrabaho

tengga ang pabrika kung wala ang obrero

panahon nang taasan ang kanilang sweldo

- gregoriovbituinjr.

08.14.2024

Edukadong nagnanakaw sa bayan?

EDUKADONG NAGNANAKAW SA BAYAN?

tanong: "Kung edukasyon ang sagot sa kahirapan

ay bakit edukado ang nagnanakaw sa bayan?"

sa isang pader ay malaking sulat ng sinuman

tanong iyong marahil ay di na palaisipan

dahil talamak ang katiwalian sa gobyerno

kung saan naroon ang mga lider-edukado

nasa poder ng kapangyarihan ang mga tuso

na pag-aaring pribado sa kanila'y sagrado

ah, naging edukado ba sila upang salapi

sa kabang bayan ay kanilang maging pag-aari?

bakit ba pawang edukado ang mga tiwali?

na sa pwesto'y nagkamal ng pribadong pag-aari

bakit ba edukado ang nagnanakaw sa bayan?

silang mga dahilan ng sukdulang karukhaan!

paumanhin po kung aming pinaniniwalaan:

pribadong pag-aari ang ugat ng kahirapan!

kung mga ito'y tatanggalin sa kanilang kamay

tulad ng lupang dapat ay pakinabangang tunay

tiyak mawawala ang ganid sa kanilang hanay

at may bagong umagang sa daigdig ay sisilay

- gregoriovbituinjr.

08.12.2024

* litrato mula sa google

Makiisa sa Laban ng Tsuper ng UP Community

MAKIISA SA LABAN NG TSUPER NG UP COMMUNITY

upang magpagawa ng dyaryong Taliba'y nagtungong UP

mula Cubao-Philcoa, sumakay ng dyip biyaheng UP

may paskil sa tatangnan ng dyip na ito ang sinasabi:

"Makiisa sa Laban ng Tsuper ng UP Community"

kaya ang panawagang iyon ay agad kong binidyuhan

upang maibahagi ko sa kapwa natin mamamayan

tagos sa aking puso't diwa ang kanilang panawagan

na dapat tayong lumahok upang ipagwagi ang laban

bagamat wala mang paliwanag sa kanilang polyeto

panawagan iyon sa tulad nating karaniwang tao

lalo't mga tsuper ay kauri, manggagawa, obrero

kausapin lang sila upang mabatid natin ang isyu

di dapat mawalan ng trabaho o ng pinapasada

ang mga tsuper dahil modernisasyon ang polisiya

halina't kampihan ang pinagsasamantalahang masa

kaya ating dinggin ang daing at pinaglalaban nila

- gregoriovbituinjr.

08.12.2024

* binidyo ng makatang gala noong Sabado, Agosto 10, 2024, habang nakasakay ng dyip biyaheng UP Philcoa

* ang bidyo ay mapapanood sa kawing na: https://fb.watch/tVdIKRY2lk/ 

Isyung Pre-SONA at Post-SONA ng Taliba ng Maralita

ISYUNG PRE-SONA AT POST-SONA NG TALIBA NG MARALITA

Maikling sanaysay at tula ni Gregorio V. Bituin Jr.

Bihirang gawin ng patnugutan na magkaroon ng dalawang isyu ng Taliba ng Maralita sa loob lang ng dalawang linggo nitong iskedyul, na nagawa lang sa isyung Hulyo 16-31, 2024. Dahil sa dami ng mga balita't pahayag ay napagpasyahan ng patnugutan na dalawang isyu ang ilabas para sa isyung Hulyo 16-31, 2024. Ang una'y Pre-SONA isyu at ang ikalawa'y Post-SONA isyu. Ang Taliba ng Maralita ang opisyal na publikasyon ng Kongreso ng Pagkakaisa ng Maralitang Lungsod (KPML).

Hindi naman maaaring ilagay sa isyung Hulyo 1-15, 2024 ang nasa Pre-SONA isyu, dahil naganap ang mga aktibidad sa Pre-SONA isyu ay hindi sakop ng petsang Hulyo 1-15, 2024. Ang Pre-SONA ay mula Hulyo 16 hanggang Hulyo 21, bisperas ng SONA ni BBM. Hindi rin dapat ilagay sa isyung Agosto 1-15, 2024 ang post-SONA dahil tiyak na may ibang naganap sa Agosto 1-15, lalo na matapos ang bagyong Carina. Ang Post-SONA isyu ay mula Hulyo 22 (aktwal na araw ng SONA) hanggang Hulyo 31.

Sa isang buwan ay dapat may malathalang dalawang isyu ng Taliba, o dalawang beses kada buwan. Isa sa unang dalawang linggo at isa pa sa huling dalawang linggo. Kaya nga ang petsa ng isyu ay tulad ng Pebrero 16-28, 2024, Hulyo 1-15, 2024, Hulyo 16-31, 2024, o Agosto 1-15, 2024.

Ang nilalaman ng Pre-SONA isyu ay Press Conference ng mga maralita noong Hulyo 17 bago mag-SONA, na siya ring headline; ang State of Human Rights Adress (SOHRA) na pinangunahan ng Philippine Alliance of Human Rights Advocates (PAHRA) noong Hulyo 16, na dinaluhan ng iba't ibang human rights organizations, kung saan isa sa tagapagsalita ay ang sekretaryo heneral ng KPML; at ang State of the People's Address (SOPA) na pinangunahan ng Freedom from Debt Coalition (FDC) na dinaluhan naman ng dalawang kinatawan ng KPML noong Hulyo 19.

Ang Post-SONA isyu naman ay naglalaman ng naganap sa SONA kung saan nagrali muna sa tapat ng tanggapan ng Department of Human Settlements and Urban Development (DHSUD) ang mga maralita sa pangunguna ng KPML, Samahan ng Mamamayan-Zone One Tondo Organization (SM-ZOTO), at Partido Lakas ng Masa (PLM). Nilalaman din nito ang pahayag ng KPML sa SONA, pahayag ng PLM matapos ang SONA, pahayag ni Ka Leody, at ang pahayag ng PAHRA.

Sadya ring pinag-isipan ang pagsulat ng Editoryal kada isyu dahil dito makikita ang paninindigan ng patnugutan sa iba't ibang isyung tumatama sa maralita.

Patuloy din ang paglalathala ng kolum ni Ka Kokoy Gan na siyang kasalukuyang pangulo ng KPML.

Nag-aambag din ang Taliba ng Maralita sa panitikang Pilipino, o sa sinasabi nating panitikang maralita, panitikang dukha, o panitikang proletaryo. Pagkat di pa rin nawawala ang maikling kwento sa pahina 18-19 at tula sa pahina 20 sa kada labas ng Taliba. Sa Pre-SONA isyu, ang pamagat ng kwento ay "Budul-Budol sa Maralita" na batay sa inilabas na pahayag ng maralita sa kanilang presscon, habang sa Post-SONA isyu ay "Bigong-Bigo ang Masa". Dalawang kwentong ang pamagat ay mula sa daglat na BBM.

Isa sa mga pinagkukunutan ko talaga ng noo ang pagsusulat ng maikling kwento, pagkatha ng mga tula, at komiks na Mara at Lita, na balang araw ay maaaring isalibro. Ang mga maikling kwento ay maaaring malathala sa mga librong aralin sa elementarya at sekundarya. Ang tugma at sukat sa pagtula ay talaga kong pinaghuhusayan upang kung nais ng ibang taong ito'y ilathala ay malaya nilang mailalathala, basta huwag lang baguhin kahit isang letra at ilagay ang pangalan ko bilang may-akda ng tula.

Sa tulad kong manunulat, mahalaga pa rin ang paglalathala ng 20-pahinang Taliba ng Maralita. Bagamat uso na ngayon ang social media o socmed tulad ng facebook, wordpress, instagram, at iba pa, mahalaga pa ring malathala sa papel ang munting pahayagang ito. Ayaw pa rin nating maganap ang nangyari sa pahayagang Baguio Midland Courier na matapos ang mahigit pitumpung taon ay namaalam na nitong Hunyo, kung saan inilathala nila ang kanilang huling isyu. Katulad ng mga kakilala kong may napaglalathalang pahayagan, pag ako'y tinanong kung saan ba ako nagsusulat, may masasabi akong pahayagang pinagsusulatan. Agad na maipagmamalaki kong sasabihing sa Taliba ng Maralita.

Isa pa, kaya dapat patuloy ang paglalathala ng Taliba ng Maralita ay dahil karamihan pa rin naman ng maralita ay walang akses sa internet, at magandang binababaan talaga. Mabigyan sila, kung di man mabentahan, ng Taliba ng Maralita. Isa rin itong paraan ng mga organisador upang makausap at makatalakayan ang mga maralita sa iba't ibang komunidad.

Kaya patuloy lang tayo sa paghahandog sa mga kauri nating maralita ng mga napapanahong isyu ng dukha, pahayag, balita, at panitikan sa Taliba ng Maralita. Patuloy natin itong ilalathala para sa mga dukha hanggang marating ng maralita ang pangarap nitong lipunang makatao, lipunang pantay, at lipunang walang pagsasamantala ng tao sa tao. Mabuhay ang mga maralita!

ISYUNG PRE-SONA AT POST-SONA NG TALIBA NG MARALITA

dahil sa maraming naganap sa dalawang linggo

ay napagpasyahang maglabas ng dalawang isyu

pambihirang desisyon para sa ating diyaryo

dahil nilalaman ay di sapat sa isang isyu

bihira ang gayong pagpapasya ng patnugutan

na dahil sa dami ng isyu'y ginawan ng paraan

may Pre-SONA na, may Post-SONA pa sa pahayagan

bilang ambag din ng maralita sa kasaysayan

nalathala rin dito'y maikling kwento at tula

na pinagsikapan ng manunulat at makata

ang komiks na Mara at Lita na pangmaralita

editoryal na may malalim na kuro ng dukha

kasaysayan ng laban ng dukha'y ilathala rin

nang mahanguan ng aral ng susunod sa atin

halina't basahin ang munting pahayagan natin

ang pinagsikapang ito'y pag-isipan at damhin

08.11.2024

Panonood ng Asedillo sa MET

PANONOOD NG ASEDILLO SA MET

Maikling sanaysay at tula ni Gregorio V. Bituin Jr.

Muli kong pinanood ang pelikulang Asedillo ni FPJ nang ito'y ipalabas ng libre sa Metropolitan Theater (MET) nitong Biyernes, Agosto 9, 2024, mula 1pm-4pm. Alas-dose pa lang ay nasa MET na ako, at 12:30 pm ay nagpapasok na sila. Marami na ring tao.

Sa youtube kasi ay bitin at may pinutol na eksena. Iyon ay napanood ko na rin sa wakas. Iyon ang pagbaril kay Asedillo at sa kanyang mga kasama sa kubong kampo nila sa bundok. Bagamat noong bata pa'y pinalabas din iyon sa telebisyon, subalit hindi ko yata napansin kundi ang dulong bahaging nakabayubay na si Asedillo sa isang punongkahoy.

May anak siyang si Rosa, na sa pelikula bago siya mamatay ay kapapanganak pa lang. Si Aling Rosa, na nasa higit 70 taong gulang na, ay nakaharap na namin ilang taon na ang nakararaan, nang kami'y magtungo sa lugar nina Asedillo sa Laguna, kasama ang mga kasapi ng Bukluran ng Manggagawang Pilipino - Southern Tagalog (BMP-ST). isa na lamang iyong alaala.

May programa muna bago magsimula ang pelikula sa MET. Ganap na 1:15 ng hapon ay inawit na ang Pambansang Awit ng Pilipinas. Sunod ay pinakilala at nagsalita si Ginoong Marasigan, na siyang direktor ng MET. At binanggit niya ang ginawang pagretoke sa pelikula upang maging bago, na ginawa ng mga artist ng FPJ Production. Naglitratuhan. 

Nabanggit din ni Ginoog Marasigan ang mga balita noon na ayaw ng mga manonood na makitang namatay si FPJ sa pelikula. Kaya marahil tinanggal sa youtube ang tagpo nang paslangin sa FPJ. 

Subalit sa pelikula, hindi pinakitang napaslang si Asedillo kundi ang pagkahawak niya ng mahigpit sa punyal habang nirarapido ng putok ang kanilang kampo, at ang pagkahulog ng punyal sa lupa nang nakatusok patayo.

Isang beses ko lang napanood sa pelikula niya na napatay si FPJ - sa pelikulang Ang Probinsiyano, kung saan napatay si Ador ngunit naitago agad ng kanyang hepe ang bangkay. Tinawagan ng hepe ang kakambal ni Ador na si Cardo mula sa probinsya upang siyang palabasing si Ador.

Magandang naipalabas muli ang pelikulang Asedillo kahit isang araw lang sa MET. Kaya pinaglaanan ko talaga iyon ng panahon at salapi kahit libre. Agad akong nagparehistro isang linggo bago ang palabas. Ginawan ko ng munting tula ang karanasang ito.

SI DODO ASEDILLO

Dodo ang palayaw ni Asedillo sa pelikula

Dodo ang tawag ng ikalawang asawang si Julia

si Pedring ang anak sa una, si Rosa sa pangalwa

dati pala siyang guro noon sa elementarya

sa awiting My Philippines, mga bata'y nangatuto

ipinakita niyang siya'y makamasang maestro

tinanggal sa pagtuturo't di maka-Amerikano

hanggang kuning hepe ng pulis ng isang pulitiko

dahil sa pulitika, siya'y ginawan ng masama

presidente ng bayan pinagbintangan siyang lubha

binugbog ng kapulisan, may kumita't natutuwa

na sa bandang huli'y pinaghigantihan niyang sadya

hanggang siya'y mapasapi sa Kilusang Anakpawis

katiwalian sa kanyang bayan ay di na matiis

naging rebelde hanggang konstabularyo na'y nanugis

ang KARAPATAN NG DUKHA'y bukambibig niyang labis

nabatid ng kalaban ang kanyang kinaroroonan

dahil isang tinanggap na kasama'y naghudas naman

hanggang sapitin ni Asediilo yaong kamatayan

siya'y bandido subalit bayani sa sambayanan

08.10.2024

Pangiliti

PANGILITI

sa pahayagang Taliba ng Maralita

may komik istrip na sadyang nakatutuwa

isyung pulitikal sa dukha tumatama

pinag-iisipang sadya bago makatha

kailangan talagang maging mapagmasid

amuyin at lasahan ang nasa paligid

mag-ingat lamang baka ugat mo'y mapatid

sa katatawa sa dyok na kanilang hatid

ang karakter dito'y sina Mara at Lita

na akala mo'y kambal pag iyong nakita

subalit sila'y magkaklase sa eskwela

nang grumadweyt ay nagkasama sa pabrika

biktima ng salot na kontraktwalisasyon

kaya nawalan sila ng trabaho roon

naging maralitang iskwater sila ngayon

lider-maralita na sa organisasyon

kaytitindi ng kanilang mga usapan

sa pahayagang Taliba matutunghayan

pilantik ng panitik, may diwang tahasan

tuwing labas ng Taliba'y inyong abangan

- gregoriovbituinjr.

08.10.2024

* ang pahayagang Taliba ng Maralita ang opisyal na publikasyon ng pambansang organisasyong Kongreso ng Pagkakaisa ng Maralitang Lungsod (KPML)

3,000 ektarya ng WPS, naangkin na ng China

3,000 EKTARYA NG WPS, NAANGKIN NA NG CHINA

isa iyong matinding balitang ating nakalap

tatlong libong ektarya natin ay naangking ganap

ng China, anong salitang iyong maaapuhap

pag ganyang balita'y nabasa mo, iyo bang tanggap?

ganyan daw kalaki ang inaangking teritoryo

ng China sa West Philippine Sea, gera na ba ito?

subalit ano nang gagawin ng ating gobyerno?

magpapadala ba roon ng pulis at sundalo?

Panganiban Reef, Mabini Reef, Subi Reef, sakop na

at pinagtayuan ng base militar ng Tsina

tatlo lang iyan, siyam ang EDCA ng Amerika

Pinas ay pinag-aagawan ng Oso't Agila

may kasaysayan ang Vietnam na dapat aralin

nang Pransya at Amerika ay kanilang talunin

mamamayan nila ang may misyon at adhikain

nang walang tulong ng dayuhan, na dayo'y gapiin

ganyan sana, sama-sama ang mamamayan, madla

na talunin ang U.S. at Tsina sa ating bansa

talunin din ang kababayang burgesya't kuhila

at itayo ang lipunan ng uring manggagawa

- gregoriovbituinjr.

08.08.2024

* ulat mula sa headline at pahina 2 ng pahayagang Pilipino Star Ngayon, Miyerkules, Agosto 7, 2024

300 nagpakalbo, ihaharang ang buhok sa oil spill

300 NAGPAKALBO, IHAHARANG ANG BUHOK SA OIL SPILL

nais kong makiisa sa tatlong daang Spartan

o higit tatlong daang residente ng Bataan

na nagpakalbo upang buhok nila'y ipangharang

sa oil spill, langis na tumapon sa karagatan

sa labingsiyam na barangay kapitan po ninyo

at nagpakalbong taga-Bataan, saludo ako

nais kong tumulong at nais ko ring magpakalbo

ngunit paano madadala riyan ang buhok ko

kung may ganyang aktibidad din dito sa Maynila

agad akong pupunta't magboboluntaryo na nga

ibibigay ang buhok upang iharang na lubha

sa oil spill na sa laot ay nanalasang sadya

sa naunang nagpakalbo, sa inyo'y nagpupugay

sana sa misyon ninyo, ako'y makasamang tunay

higit pa sa ginawa ni Yulo ang inyong pakay

di man gintong medalya, gintong puso'y inyong taglay

- gregoriovbituinjr.

08.07.2024

* ulat mula sa headline at pahina 2 ng pahayagang Pang-Masa, Agosto 7, 2024

Ang pinaghirapang ginto ni Yulo

ANG PINAGHIRAPANG GINTO NI YULO

dalawang Olympic Gold ang maiuuwi

ni gymnast Carlos Yulo na dangal ng lahi

anang ulat, Caloy, ikaw ay binabati

ng pangulo, pagkat nakamit mo ang mithi 

sadyang pinaghirapan mo ang Olympic gold

di lang isa, kundi dalawa ang iyong gold

habang pangulo'y mayroon daw Tallano gold

di pa makita ng bayan ang nasabing gold

dahil sa sipag, talino't loob mong buo

nakamit mo ay dalawang medalyang ginto

pangulo naman noon pa'y pulos pangako

bente pesos na kilong bigas nga'y napako

naukit na, Carlos Yulo, ang pangalan mo

sa kasaysayan ng isport ng bansang ito

di tubog sa ginto, tiyak tunay ang gold mo

tanging masasabi'y pagpupugay sa iyo

- gregoriovbituinjr.

08.05.2024

Upang magwakas ang kahirapan

UPANG MAGWAKAS ANG KAHIRAPAN

"But kings and mightiest potentates must die,

for that's the end of human misery."

~ from Henry VI, by William Shakespeare

sinulat na noon ni Shakespeare ang katotohanan

dapat elistista't burgesya'y mawalang tuluyan

nang magwakas ang pagsasamantala't kaapihan

na dinaranas ng sinuman at ng aping bayan

aniya, patayin ang mga trapo, hari't pari

silang nagpapasasa sa pribadong pag-aari

silang dahilan ng hirap ng inaaping uri

silang mapagsamantala'y sadyang kamuhi-muhi

ngunit may batas silang mga mapagsamantala

korte, senado, kongreso, pulis, ay kontrol nila

pati iyang simbahan, paaralan, at masmidya

upang mamamayang inaapi ay di mag-alsa

kaya dapat tayong kumilos tungong rebolusyon

upang mapagsamantalang uri'y mawala ngayon

kung nais nating mawala ang kahirapang iyon

dapat tigpasin ang ulo ng naghaharing leyon

baligtarin ang tatsulok, kalusin silang todo

salamat, William Shakespeare, at nauunawaan mo

gamit ang panitikan, sinulat mo ang totoo

kaya tulad kong makata sa iyo ay saludo

- gregoriovbituinjr.

08.01.2024

Balitang Carina

BALITANG CARINA

tinunghayan ko ang pahayagan

ngayong araw, kaytitinding ulat

ng unos na naganap kahapon

nagbaha ang buong kalunsuran

nilampasan na ang bagyong Ondoy

sa buong pagluha ni Carina

baha sa maraming kabayanan

mga pamilya'y sinaklolohan

dahil nagsilubog ang tahanan

nilikha iyon ng kalikasan

ipinakita ang buong ngitngit

nagngangalit ang klima at langit

climate action na nga'y kailangan

upang matugunan ang naganap

subalit anong gagawing aksyon

makipag-usap sa P.M.C.J.,

K.P.M.L., Sanlakas, B.M.P.,

S.M. ZOTO, CEED, A.P.M.D.D

samahan natin sila sa rali

panawagan: climate emergency

mag-shift sa renewable energy

climate adaptation, mitigation

ipagbawal na ang mga coal plant

pati ang liquified natural gas

kontakin ang Bulig Pilipinas

para sa ating maitutulong

sa mga biktima ni Carina

kailangan ng kongkretong aksyon

para sa sunod na henerasyon

na may ginawa rin tayo ngayon

- gregoriovbituinjr.

07.25.2024

* litrato ay mga headline ng pahayagang Abante Tonite at Pilipino Star Ngayon, Hulyo 25, 2024

* PMCJ (Philippine Movement for Climate Justice)

* KPML (Kongreso ng Pagkakaisa ng Maralitang Lungsod)

* BMP (Bukluran ng Manggagawang Pilipino)

* SM-ZOTO (Samahan ng Mamamayan - Zone One Tondo Organization)

* CEED (Center for Energy, Ecology, and Development)

* APMDD (Asian People's Movement on Debt and Development)

Pagpupugay sa pagwawagayway

PAGPUPUGAY SA PAGWAWAGAYWAY

isang karangalang mabidyuhan

ang pagwawagayway ng bandila

ng samutsaring mga samahan,

ng guro, obrero, masa, dukha

na ginawan ko ng pagpupugay

at tulang makabagbag-damdamin

sumusuot sa kalamnang taglay

at yaring puso'y papag-alabin

binanggit ng tagapagsalita

sa rali yaong mga pangalan

ng mga samahang ang adhika

itayo'y makataong lipunan

sa kanila, mabuhay! MABUHAY!

iyan ang tangi kong masasabi

taaskamao pong pagpupugay

sapagkat sa masa'y nagsisilbi

mabuhay kayo, mga kasama!

kayong tunay naming inspirasyon

para sa karapatan, hustisya

at lipunan nating nilalayon

- gregoriovbituinjr.

07.23.2024

* bidyong kuha ng makatang gala sa pagkilos sa SONA, 07.22.2024

^ ang bidyo ay mapapanood sa: https://www.facebook.com/reel/1143756510213675

Nang umulan sa SONA

NANG UMULAN SA SONA

Sa SONA ay kaylakas ng ulan

Kaya raliyista'y naulanan

Mga pulis ba'y takot sa ulan?

At nauna sa masisilungan?

O ito lang ay napaghandaan?

Serve and protect ba'y talagang ganyan?

Sarili'y unang poprotektahan?

Pinrotektahan laban sa ulan...

- gregoriovbituinjr.

07.23.2024

* litratong kuha ng makatang gala sa Commonwealth sa rali sa ikatlong SONA ni BBM, Hulyo 22, 2024

Tulang binigkas sa SOHRA 2024 (State of Human Rights Address)

TULANG BINIGKAS SA SOHRA 2024

(State of Human Rights Address)

bilang sekretaryo heneral nitong organisasyong

Kongreso ng Pagkakaisa ng Maralitang Lungsod,

tinalakay ko sa SOHRA ang mga isyu ng dukha

sa pagtatapos ng presentasyon, binigkas ko'y tula:

"for homeless and underprivilege" batay sa Konstitusyon

ang pabahay ngunit 4PH ay kaiba ang layon

ang 4PH ay pabahay di para sa walang bahay

kundi sa may Pag-ibig at kayang magbayad ng tunay

ang presyo pa ng pabahay ay batay sa market value

kaya tubo o profit ang pangunahing layon nito

dapat batay sa CAPACITY TO PAY ng maralita

at di sa tutubuin ng kapitalistang kuhila

parang sapilitan sa dukha ang 4PH na iyan

na sa ayaw mo't gusto, tatanggalin ka sa tahanan

etsapwera na ang maralita sa lipunang ito

ay nagagamit pa upang pagtubuan ng gobyerno

ang market value ay sagka sa karapatan ng dukha

na dapat gobyerno ang sa kanila'y kumakalinga

sa mga kasama sa SOHRA, kung kayo'y may mungkahi

pagtulungan natin upang dukha’y di naduduhagi

- gregoriovbituinjr.

07.16.2024

* litratong kuha ng makatang gala, 07.16.2024

* ang SOHRA ay pinangunahan ng Philippine Alliance of Human Rights Advocates (PAHRA)

Di na lang antas-dalo

DI NA LANG ANTAS-DALO

tapos na ako sa panahong antas-dalo

di tayo flower base lang, aking napagtanto

sa anumang pagkilos na kasama tayo

di maaaring nakatunganga lang ako

may isang rali na ako'y nabugbog naman

isang kakilala ang ako'y pinayuhan

ang sabi niya, "huwag ka kasi sa front line!"

ano ako, tuod? doon lang sa likuran?

di tayo dumadalo upang pamparami

kundi tiyaking naroon tayong may silbi

sa samahan, bayan, ngunit di pahuhuli

nais ko'y may tangan laging plakard sa rali

ayokong dadalo lang at nakatunganga

na sa isyu't usapin ay natutulala

kung may matututunan ay pupuntang sadya

upang pagtingin sa isyu'y maisadiwa

minsan, sa mga forum naiimbitahan

ayos lang dumalo't may napag-aaralan

ngunit ngayon, ayokong antas-dalo na lang

kundi may naiaambag sa talakayan

noong kabataan ko'y antas-dalo lagi

nabatid na trapo'y di dapat manatili

kaya nais kong tumulong upang magwagi

ang dukha't manggagawa sa laban ng uri

- gregoriovbituinjr.

07.11.2024

Bilyones na pondo para sa klima

BILYONES NA PONDO PARA SA KLIMA

aba'y pitongdaan walumpu't tatlong bilyong piso

na pala ang nakuhang suporta ng ating bansa

mula tatlumpu't isang development partners nito

na para raw sa climate change action plan, aba'y di nga?

may dalawampu't tatlong proyektong pangtransportasyon

National Adaptation Plan, kaygagandang salita

nariyan pa'y Nationally Determined Contribution

Implementation Plan, batid kaya ito ng madla?

siyamnapu't apat ang proyektong inisyatiba

para sa gawaing pangklima habang iba naman

ay mula raw sa pautang, pautang? aba, aba?

anong masasabi rito ng ating mamamayan?

anong tingin dito ng Freedom from Debt Coalition?

sa bilyon-bilyong pautang ba'y anong analysis?

di na ba makukwestyon kahit suportang donasyon?

anong tingin ng Philippine Movement for Climate Justice?

pabahay ng mga na-Yolanda'y kasama kaya?

sa climate emergency ba pondong ito na'y sagot?

bakit climate emergency'y di ideklarang sadya?

nawa'y pondo'y di maibulsa ng mga kurakot!

- gregoriovbituinjr.

07.11.2024

* ulat mula sa pahayagang Abante Tonite, Hulyo 9, 2024, pahina 3

Suhol

SUHOL

pagsaludo sa taong di tumatanggap ng suhol

kung may akusasyon, sarili'y dapat ipagtanggol

matuwid magsalita, di nagkakabulol-bulol

lalo na't nasa kapangyarihan, may nanunulsol

ibig sabihin, may pabor kapalit ng salapi

dapat usisain lalo't bansa'y naduduhagi

ang akusasyon ng suhol ay dapat lang masuri

dahil pagkatao na'y may bahid pag di napawi

anong patunay ng nagbibintang sa akusasyon?

paano naman ba pasisinungalingan iyon?

lalo't sa susunod na taon na'y mid-term election

paninira ng kredibilidad ba'y nilalayon?

sino bang iuupo sa Senado at Kongreso?

o Mababang Kapulungan, sinong ipapanalo?

pag ahensya'y gumalaw dahil nasuhulan ito

aba'y kawawa naman ang totoong ibinoto!

may patas bang halalan pag may ganyang pag-uulat?

na dapat nating subaybayan baka makulimbat

ang boto ng masa't kandidato nila'y masilat

ah, buong katotohanan sana nga'y mabulatlat

- gregoriovbituinjr.

07.11.2024

* ulat ay headline sa pahayagang Abante, Hulyo 10, 2024

* suhol - pagbibigay ng salapi o anumang bagay sa maykapangyarihan kapalit ang anumang pabor, mula sa UP Diksiyonaryong Filipino, pahina 1179

Ulog - Walang taong bayan sa isang lugar

ULOG - WALANG TAONG BAYAN SA ISANG LUGAR

may isang awit noong narinig ko nang bata pa

liriko: "Wala nang tao sa Santa Filomena"

sa krosword, awiting iyon ay aking naalala

Apat Pababa: Walang taong bayan, ano nga ba?

di ko alam ang tamang sagot, diwa ko'y kinapos

animo isip ko'y nilalatigo't inuulos

sinagot ang Pababa't Pahalang hanggang matapos

lumabas na sagot ay ULOG, ako'y nakaraos

tiningnan ang kahulugan sa talahuluganan

kung bakit salitang ULOG ay "walang taong bayan"

naroon: "pag-alis sa pook dahil sa digmaan..."

nilisan ng mga bakwit ang kanilang tahanan

tila istorya ng Santa Filomena ang ulog

tulad sa Marawi, buong bayan ay nabulabog

baka kabahayan at kabuhayan pa'y sinunog

dahil sa digma, pook nila'y talagang nadurog

ah, naalala ko lamang ang nasabing awitin

mga bakwit ba sa lugar nila'y nakauwi rin?

may kapayapaan na ba sa bayan nila't natin?

upang ulog ay di na larawang dapat sapitin?

- gregoriovbituinjr.

07.10.2024

* krosword mula sa Abante Tonite, Hulyo 9, 2024, p.7

* ulog - 3. Sinaunang Tagalog, pag-alis o pagkawala ng mga naninirahan sa isang pook dahil sa digmaan, salot, at katulad, mula sa UP Diksiyonaryong Filipino, p.1299

Pagbebenta ng lupa sa mga dayuhan?

PAGBEBENTA NG LUPA SA MGA DAYUHAN?

sa ChaCha nga kaya ito'y ating tinututulan

dahil edukasyon, masmidya, pati kalupaan

nitong ating bansa'y pinaplanong gagawin naman

na sandaang porsyentong pag-aari ng dayuhan

subalit masa'y mayroong bagong katatakutan

ang pagbebenta umano ng lupa sa Palawan

at ibang lalawigan na bumibili'y dayuhan!

tanong natin, aling banyaga ang napagbibilhan?

inuupahan at binibili raw ay palayan

banggit sa ulat ang Nueva Ecija't Palawan

magsasaka'y natutuwa't sila'y nababayaran

ngunit seguridad sa pagkain ang tatamaan

uupahan muna'y isang ektarya ng palayan

sa presyong walumpu hanggang sandaang libo naman

ngunit simula lang ito, bibilhin kalaunan

makokontrol na nila anong itatanim diyan

ngayon nga, maraming iskwater sa sariling bayan

ay ibebenta pa ang lupa sa mga dayuhan

marapat lang isyung ito'y ating masubaybayan

bago pa tayo'y wala nang lupa't bansang matirhan

- gregoriovbituinjr.

07.06.2024

* ulat mula sa pahayagang Tempo, Hunyo 30, 2024, p.1 at 2

Ang esensya ng buhay

ANG ESENSYA NG BUHAY

anong esensya ng buhay? / bakit ako aktibista?

ang pagpapayaman nga ba / sa buhay itong esensya?

maging makapangyarihan / sa bansa't sa pulitika?

esensya na ba ng buhay / pag marami ka nang pera?

ako'y naging aktibistang / may prinsipyong tinataglay

sapagkat sa nangyayari / sa mundo'y di mapalagay

adhika kong makatulong / sa nahihirapang tunay

sa ganyan ko nakikita / ang esensya ko sa buhay

kahit gaano karami / ang yaman ko't pag-aari

kung nakuha ko lang ito / sa paggawa ng tiwali

sinayang ko ang buhay kong / sira ang dangal o puri

na nabubuhay sa mali't / sa tanang pagkukunwari

aanhin kong nakatira / sa mansyon man o palasyo

kung kapwa ko maralita'y / hinahamak pa ring todo

kung kapwa ko manggagawa'y / lagi nang iniinsulto

habang wala akong kibo / na dapat kumibo ako

ako'y pipikit na lang bang / marami'y kinakawawa

alam kong may inaapi 'y / di na lang magsasalita

anong klaseng tao ako / na kapwa'y binalewala

di ako paparis diyan / sa mga tuso't kuhila

kaya ako aktibista / dahil dito ko nagagap

ang esensya nitong buhay / at sa lipunang pangarap

may pagkakapantay-pantay, / bawat isa'y lumilingap

na tumutulong sa kapwa / at di lilo't mapagpanggap

subalit di kawanggawa / ang adhika kong pagtulong

kundi bulok na sistema'y / nagkakaisang ibaon

sa hukay ng mga gutom / at sama-samang ituon

ang lakas sa pagtatayo / ng lipunang sinusulong

- gregoriovbituinjr.

07.05.2024

Bawal ang bastos

BAWAL ANG BASTOS

sa nasakyan kong minibus, tawag ay ejeep

ay may paskil doong sabi'y "Bawal ang Bastos"

na mga mata ko'y agad iyong nahagip

buti't bago bumaba'y nakunan kong lubos

halos ilang segundo lamang ang pagitan

bago bumaba ako'y nakapaglitrato

kundi iyon ay mawawala nang lubusan

sa aking diwa, buti't agad nakunan ko

pagkat kayganda ng nasabing panawagan

nang mapatimo iyon sa diwa ng masa

nang mapatino ang mga manyak at bastos

na ang gawain pala nila'y may parusa

"Bawal Bastos Law" ay ganap nang sinabatas

sa hubog ng babae'y bawal nang tumitig

o tsansingan sila'y isa nang pandarahas

sa nasabing batas, bastos na'y inuusig

- gregoriovbituinjr.

07.05.2024

* Ang RA 11313 o "Safe Spaces Act" ay tinatawag ding "Bawal Bastos Law"

Ang tatak sa poloshirt

ANG TATAK SA POLOSHIRT

"Nagkakaisang Lakas"

ay "Tagumpay ng Lahat!"

sa poloshirt ay tatak

ito'y nakagaganyak

upang ako'y kumilos

kahit madalas kapos

sa buhay na hikahos

naghahandang makalos

ang bulok na sistema

habang inaasam na'y

panlipunang hustisya

para sa aping masa

gabay na't inspirasyon

sa pagkilos ko't layon

ang natatak na iyon

upang tupdin ang misyon

- gregoriovbituinjr.

07.05.2024

* litratong kuha ng makatang gala sa pagkilos tungong Mendiola, 06.12.24

Hinagpis ng masa

HINAGPIS NG MASA

madalas, ang masa'y naghihinagpis

sa maraming problemang tinitiis

bahay ng maralita'y inaalis

buhay ng manggagawa'y tinitiris

paghihinagpis ba'y palaisipan

dukha'y laksa't mayaman ay iilan

kayraming hirap at pinahirapan

ng sistemang tadtad sa kabulukan

ang malupit at mapagsamantala

ay dapat lamang talunin ng masa

lalo't elitista't kapitalista

ang yumuyurak sa dignidad nila

ah, di tayo dapat maghinanakit

sa mga trapo't burgesyang kaylupit

sa masa, halinang magmalasakit

upang karapatan nila'y igiit

halina't magpatuloy sa pagkilos

at maghanda sa pakikipagtuos

sa mga sakim at mapambusabos

upang sistemang bulok na'y matapos

- gregoriovbituinjr.

07.03.2024

Ang sahurang alipin

ANG SAHURANG ALIPIN

ikaw ang tumutustos sa buong pamilya

o baka may malaking pagkakautang ka

ay, ganyan ka inilalarawan tuwina

gayong kakarampot mong sahod ay kulang pa

akala nila'y lagi kang paldo pag sweldo

na kayrami nilang nakaasa sa iyo

anak mo, pamangkin, asawa, lola, lolo

o kaya'y kumpareng lasenggo't lasenggero

ano ka nga ba, manggagawa o makina?

makina kang laging nagtatae ng pera?

o makinang alipin ng kapitalista?

kapitalistang panginoon sa pabrika?

O, manggagawa, kapatid naming obrero

ikaw ba'y minahan ng libo-libong piso

na ibinibigay mo sa kapitalismo

tao ka ring napapagod na katulad ko

kaytagal mo nang kalahok sa tunggalian

nitong mapang-alipin at kaalipinan

ang pagkasahurang alipin mo'y wakasan

at palayain na sa kapital ang bayan

- gregoriovbituinjr.

07.01.2024

* kathang tula ng makatang gala batay sa ibinigay na larawan    

Alay na tula sa Wealth Tax Assembly

ALAY NA TULA SA WEALTH TAX ASSEMBLY

O, dukha't manggagawa, / tara nang magkaisa

sama-samang baguhin / ang bulok na sistema

para sa karapata't / panlipunang hustisya

at sa kinabukasan / ng mayorya, ng masa

di tayo sawsaw-suka / na winawalanghiya

ng mga naghaharing / elitista’t kuhila

di hanggang ayuda lang / ang mga maralita

kundi may dignidad din / kahit na tayo'y dukha

ating ipaglalaban / kapwa natin kauri

laban sa mga trapo’t / burgesyang naghahari

wealth tax ay pairalin / pag tayo na'y nagwagi

sa trapo't elitistang / di dapat manatili

sulong, mga kasama / tungo sa rebolusyon

ng dukha’t manggagawang / may makauring misyon

sa lipunang pangarap / isip nati'y ituon

at sama-sama nating / kamtin ang nilalayon

- gregoriovbituinjr.

06.29.2024

* binasa ng makatang gala sa pagtatapos ng kanyang pagtalakay sa paksang "Wealth Tax at Maralita" sa Wealth Tax Assembly na ginanap sa UP Integrated School, Hunyo 29, 2024

* ang nasabing pagtitipon ay pinangunahan ng Bukluran ng Manggagawang Pilipino (BMP) at Asian People's Movement on Debt and Development (APMDD)

Sa gilid man ng bangin

SA GILID MAN NG BANGIN

kaming tibak na Spartan / ay nasa gilid ng bangin

ng pakikibakang dukha / na lipunan ang salamin

bakit ba lagi na lamang / nakikita'y tagulamin

at di na nalalasahan / ang ginhawang asam namin

kaya nagpapatuloy pa / sa bawat pakikibaka

upang tiyaking matamo / ang panlipunang hustisya

kaya naririto pa ring / kumikilos sa kalsada

na harangan man ng sibat / di patitinag talaga

batbat na ng karukhaan / ang mayoryang maralita

at tanging sa pagkilos lang / ng sama-sama ng madla

kalagaya'y mababago't / ibabagsak ang kuhila

ang mabago ang sistema'y / prinsipyo nami't adhika

nasa gilid man ng bangin / habang kayraming hikahos

dahil sa sistemang bulok / at mga pambubusabos

ang mga sanhi ng hirap / ay dapat nating makalos

upang lipunang pangarap / ay makamtan nating lubos

- gregoriovbituinjr.

06.29.2024

* selfie ng makatang gala sa rali ng Hunyo 12, 2024, hanggang Recto lang at di na nakapasok ng Mendiola